كطيح البكَرة كيكثرو الجناوا.. تداول خبر فايك منسوب ل”كود” ونبيلة منيب بعدما بانت “كورونا” فالمغرب

نشطاء على مواقع التواصل الاجتماعي كيتداولو على نطاق واسع السكرين ديال خبر مفبرك ومنسوب ل”كود”.
الخبر هو عبارة عن تصريح لنبيلة منيب، الأمينة العامة للحزب الاشتراكي الموحد، كتقول فيه بللي “ظرفية الإعلان عن أول حالة كورونا مؤامرة مخزنية للدفع بأساتذة وممرضي التعاقد لإرغاء مسيرتهم بالرباط”.
والقراء ديال “كود” غيتبينو بسهولة أن هذ الخبر ميمكنش يتنشر عندنا، بحكم أن العنوان ديالو مكتوب باللغة العربية، وهذشي عمرو ما كان فموقعنا اللي كيتعتبر من أشرس المدافعين على هوية المغاربة والتمغربيت.
كذلك هذ التصريح مايمكنش يصدر من قيادية ديال حزب يساري معروف، خصوصا وأن الدولة لغات مجموعة من الأشنطة اللي كتدخل عليها فلوس صحيحة، ومنها المعرض الدولي للفلاحة.
وفتصريح منيب ل”كود” على الخبر المفبرك، قالت بللي هي مايمكليهاش تعلق على بحال هذ النوع من الشائعات، وبللي لا بد يتم تكذيب هذ الأخبار المزيفة ومحاربتها قبل ما تتطور لما لا يحمد عقباه.
وأكدات أنها غاتواصل مع اللجنة المكلفة بالإعلام فالحزب باش يكذبو هذ الخبر ويستنكرو تداولو من غير دون التأكد من مصدرو.
وغير الصباح تم التداول سكرين ديال خبر مفبرك آخر كيأكد غلق المدارس بعد تسجيل أول حالة إصابة بفيروس كورونا، وهو الخبر اللي نتشر بشكر كبير فمواقع التواصل الاجتماعي، قبل ما تخرج وزارة التعليم تكذبو، وتأكد أن السكرين مصوب بتطبيق “فوتوشوب”.