هرب من الصبيطار ويقدر يكون فيه “كورونا”.. السلطات كتقلب على حراكَ مغربي جا من الطاليان وداروه فالحجر الصحي

عرفات “كود” من مصادر مطلعة بللي الحراكَ المغربي اللي كانت الطاليان سافطاتو للمغرب، وكان كيتمركَل على البوليس تماك ويدعي مرضو ب”كورونا” باش مايرجعش للبلاد، دابا راه هرب من صبيطار القرب فحي التشارك اللي كانو حاطينو فيه حتى يتأكد واش مريض فعلا بالفيروس ولا لا.
تشيطين الحراكَ دارو مع الطاليانيين وحتى المغاربة، حسب المعطيات اللي وصلاتنا، السيد سلت ليهم من الشومبر اللي كان كيخضع فيها للحجر الصحي، وهرب لوجهة مجهولة وخلا حوايجو على أساس أنه باقي فالصبيطار.
الحراكَ كان عارف بللي المصير ديالو هو الاعتقال من بعد ما يتأكدو بللي ما عندو والو، داكشي علاش هرب وسمح فالجمل وما جمل، حتى قبل ما تخرجليه نتائج الفحوصات المخبرية ويتأكد فعلا أنه مافيهش الفيروس.
وللإشارة فالحراكَ عندو ديجا سوابق، وحاول يضحك على البوليس فالطاليان ويتبوحط عليهم ويقليهم بللي مريض ب”كورونا”، لكن التحاليل اللي دار تماك خرجات سلبية.