كيفاش قوالب وزارة الصحة فأزمة كورونا.. كتتعطل فالإعلان على نتائج المصابين بكورونا وحيدات التوزيع فالجهات وحرمات الناس من حقهم فالمعلومة

فاتت العشرة وثلث ديال الصباح، والمعطيات الواردة فالموقع الإلكتروني لوزارة الصحة حول الوضعية الوبائية الخاصة بانتشار فيروس كورونا المستجد بقات هي هي.
وكان محمد اليوبي، مدير مديرية الأوبئة والوقاية من الأمراض التابعة للوزارة، أكد فندوة ليه مع الصحافة بللي غتولي الوزارة تحين المعطيات المتعلقة بالفيروس جوج مرات فاليوم، مع العشرة بيل دالصباح، ومع الستة دالعشية، تزامنا مع الندوة الصحفية اليومية اللي كتكون.
الوزارة تعطلات حتى خلات الناس ينتظرو النتائج بنفاذ صبر، خصوصا وإن هذي ماشي أول مرة كيوقع هذشي، وهذشي كايزيد يستريسي الناس ويوترهم فهذ الظرفية الصعيبة اللي كيدوز منها المغرب والعالم كلو.
لكن المشكل ماكاينش غير فهذشي، دابا المغاربة ولاو محرومين من معرفة المستجدات ديال توزيع الإصابات فالجهات، بحكم أن الوزارة حيدات اليوم لاليسط ديال هذ التوزيع من الموقع ديالها، وحرمات الناس من حقهم فالوصول للمعلومة.
وللإشارة، فأصلا كيوقع مشكل كبير فالأعداد ديال المصابين فالجهات، حيت كل مرة كتبدل الأرقام، ومرة كتزيد مرة كتنقص، خصوصا فجهة الدار البيضاء سطات وجهة الرباط سلا القنيطرة ومراكش آسفي وفاس مكناس، ومجموعة من المتابعين لاحظو هذشي وتساءلو على السبب وعلى مدى دقة هذ الأرقام.
التواصل فمرحلة الأزمة خاص يكون دقيق ومافيه أدنى التباس أو مشكل، حيت هذشي تقدر تكون عندو عواقب كبيرة، ويفتح مجال كبير للإشاعات والفايك نيوز.