7 أخطاء كتخلي بنعرفة مفيدوش وفوص نوت فمغرب "كورونا فيروس" وفضيحة يبقى بعدها. تجاهل قانون تكميم لمغاربة وبان ما عارفش علاش كيهدر وتناقض مع وزراء حكومتو فالارقام

خرجة إعلامية متخلفة دارها رئيس الحكومة سعد الدين العثماني، لبارح على المباشر ف القنوات العمومية (الأولى، دوزيم، ميدي 1)، بين أنه ضعيف سياسيا ومعندوش أجوبة على القضايا لي مبرزطة الرأي العام، فشل في إقناع المتتبعين.
"كود" جمعات ليه سبعة أخطاء أساسية تؤكد أن رئيس الحكومة مكيستحقش يكون رئيس حكومة لا قبل كورونا ولا فزمن كورونا ولا ما بعد كورونا.
ها هي الأخطاء لي خاص بنعرفة يحشم على راسو ويمشي فحالو من رئاسة الحكومة قبل ما يدير شي كارثة جديدة:
1/ رئيس الحكومة خارج السياق السياسي: تجاهل مشروع قانون 22.20 لي شعل الرأي العام ورون الحكومة والدولة، مهضرش عليه مقدمش تا شي معطيات، معطاش موقف سياسي. رئيس حكومة ضعيف سياسيا ومافيدوش.
2/ عمق أزمة العالقين وعذبهم نفسيا، عطا جواب ماشي مسؤول، جواب متناقض مع كلام وزير الخارجية، العثماني قال "العودة غاتكون ملي غايتفتحو الحدود" يعني تسناو شهور أخرى. في المقابل بوريطة قال بأن "العودة مرتبطة بتدابير صحية داخلية نوجدوا راسلنا ندخلوا الناس راه الأمور اللوجستيكبة الخاصة بالنقل متوفرة" مبشرا بالعودة القريبة.
3/ معندوش معلومات ومعندوش قوة في الإقناع، بخصوص السيناريوهات مقال والو، مهضرش على العيد الصغير ولا العيد الكبير، مهضرش على إمكانية يفتحو بعض المحلات والمعامل وفين بالضبط وكيفاش، مهضرش على بؤر فيروس "كورونا" لي فالمغرب.
4/ رئيس حكومة مقدرش يعطي اجوبة للأسر المغربية الفقيرة، لي تضررات بزاف من الجايحة، خصوصا لي خدامين في القطاع غير المهيكل ولي اصلا مخدامينش وتوقفات بهم القضية، مهضرش عليهم كيفاش يمكن يدعموهم.
5/ رئيس حكومة معندوش أرقام ومعندوش تصور لصندوق مكافحة جايحة "كورونا"، خبراء اقتصاديين كيقولو هاد الصندوق مكافيش لدعم الاسر والمقاولات المتضررة، غادوز 3 أشهر ويتوقف، الملايير شهريا كتمشي، معطاش جواب، مهضرش.
6/ عبارة "في إطار الدراسة" تكررت بزاف، الامتحانات في طور الدراسة، الوضعية الاقتصادية في طور الدارسة، رفع الحجر في طور الدراسة،.. وعلاش خرجتي اسي بنعرفة الى معندكش يقين ومعندكش معطيات، اشمن فائدة.
7/ ديما مقولب، وزارة الصحة خرجات ارقام على تطور الوضعية الوبائية، قبل ما يهضر رئيس الحكومة، يعني الخرجة ديالو فيما يخص الوضعية الوبائية مافيها تا جديد.
هادشي كامل واش هذا كيصلح يكون رئيس الحكومة على المغاربة؟.. طبعا لا وهادشي كيقولو ناس ديال حزبو ومسؤولين ف الدولة والرأي العام تاهو، والدليل دورة فالفايسبوك واسنتغرام تشوفو الحجم ديال السخرية من الخرجة لي دار.