فاتي جمالي تشافات من كورونا: كنشكر الطبيب ديالي اللي نقذني من الموت وكَاع اللي دعاو معايا

علنات فاتي جمالي، اليوم الأربعاء، شفاءها من فيروس كورونا المستجد بشكل تام.
جمالي، اللي كانت تقاست بالفيروس هذي سيمانة، نشرات فسطوريات فأنستكَرام صورة ديال التحليلة اللي دارت مؤخرا، واللي خرجات نتيجتها سلبية، وهذا كيعني أنها برات من "كوفيد 19".
وقالت جمالي "بغيت نطمن أصدقائي والمتتبعين ديالي أنه ولله الحمد تشافيت من كورونا، وكنشكر كل واحد دعا معيا وكل واحد اتصل بيا ولا بعثلي رسائل دعاء ودعم نفسي.. شكرا ليكم بزاف".
وزادت، وهي كتشكر الطبيب ديالها اللي قالت أنه نقذ ليها حياتها: "كنبغي نشكر الدكتور لي تبع حالتي يوم على يوم ودعمني نفسيا وباقي حتى هد اللحظة، كنشكر بزاف حيث عتقني من الموت فاللحظة لي كنت غادي ناخد الدواء بالغلط لي كان غدي ينهي حياتي حيت مكيتوالمش مع الفيروس... شكرا شكرا شكرا".