رمضان فالدار. أنس لباز ل"كود": كنفيق حتى للظهور حيت كنسهر فقراءة السيناريوهات.. وكندوز وقتي فالغنا والرسم التشكيلي والمطالعة.. وقاسمين ان والمدام شغال الدار

كل يوم "كود" غدي تسول فنانين ومشاهير على كيفاش كيدوزو نهارهم مع الحجر الصحي فرمضان.
اليوم معانا الممثل المغربي أنس الباز، اللي تكلملينا بدورو على كيفاش كيدوز هذ الشهر فهذ الأزمة اللي كيمر منها المغرب ديال فيروس كورونا، وقال "بصراحة أنا كنسهر واحد الشوية بالليل، كنطالع وكانقرا سيناريوات عندي، وبصراحة ماكنفيق حتى للظهر، تقريبا، وداك الساعة أنا والمادام مقسمين ليطاش بيناتنا، ودايرين لكل واحد وليزاكتيفيتي اللي خصو يدير".
وقال الباز بللي عندو مجموعة من الأنشطة الفنية اللي كيدير فهذ الحجر عامة، بحال الغنا والفن التشكيلي، "وأي حاجة كتخلي النفس ديالو خارجة على نطاق كورونا، هي الوضعية صعيبة شوية، لكن الحمد لله كنحاولو نتعايشو مع الوضع"، على حساب كلامو.
وبالنسبة للخروج "كنخرجو غير جوج مرات فالسيمانة إلى كثرنا، باش كنتقداو، وأنا ضروري نبريكولي شوية فالدار، مؤخرا صبغنا واحد الموبل وديكوريناه، كذلك تسجلت فبروكَرام smule ديال الغنا، اللي كيمكن ليك تدير دييو مع بزاف دالناس فالعالم، ومؤخرا شاركت شي أغاني مع المتابعين ديالي فأنستكَرام"، الحاجة الوحيدة اللي بغيت ندير ومالقيتش الفرصة هي نبدا فسيناريو "لاسيطاد" اللي هادي مدة وأنا كنكتب فيه لكن مزال ما كملتو.
وواخا ماكايناش الخدمة فالتيران فمجال التمثيل، الباز أكد بللي باقي على اتصال مع المخرجين والمنتجين وكيتسنا لخر ديال الحجر باش يدير أعمال أخرى.
وقال بللي هذ الحجر كيعلم بزاف دالحاجات، بحال الأهمية ديال الأسرة، وكيفاش تتماشى مع العائلة ديالك اللي كَالسين فالدار، وكيفاش تضبط أعصابك باش مايوقعوش مشاكل بينك لبينهم، كذلك تخلي مسافة امان بين الناس لوخرين
وفختام كلامو، شكر الباز الأطر الصحية اللي واقفين مع المصابين بالفيروس وقايمين بالواجب ديالهم، كيف شكر رجال الأمن، والناس اللي ملتزمين بالحجر الصحي.