بان فيديو الجمعة 11 شتنبر 2020 لمواطن فشي شكل كيغوث حدا البلاصة اللي كان داك المتهم الحقير ولد لقصر لكبير دفن فيها جثة الطفل عدنان الاثنين اللي فات بعد ما اغتاصبو وقتلو. هاد المواطن اللي سوق ليه الفيديو احد نشطاء حراك الريف بالخارج٬ كيقول "فين البوليس. حتى حد ما يمس الجثة ولا يصورها". لكن اللي وقع مختلف تماما. الوصول الى الجثة جا بعد اعتقال المتهم الرئيسي. هاد الاعتقال جا بمساعدة كبيرة من الدي اس تي =المخابرات الداخلية= وتوظف فيها التعرف بالوجه وتقنيات اخرى لانو المتهم الوحش غير ملامحو. وفق مصدر "كود" فانو بعد الاعتقال واعتراف المتهم بجريمتو مشاو للبلاصة اللي قال باللي دفن فيها الطفل. وصل الامن مع المتهم وخافو علي السكان يعرفو وديك الساعة تكون حياة المتهم فخطر وبلا ما يعيقو السكان هزو الجثة من الحفرة وداوها لمستودع الاموات. بعد ما مشاو عاد تجمعو ودار داك الفيديو اللي كيقول فين الامن يشرح مصدر "كود". المتهم كان دا الطفل مع شي الربعة ودار كاع جرائمو قبل الستة ودفنو فحفرة حدا طريق الرباطفطنجة. العائلة كانت قدمات بلاغ باختفاء الطفل مع السبعة.
