لطيفة رأفت تعصبات على الدعم اللي تعطى للفنانين وقصفات وزير الثقافة: الفلوس تعطات لشركة ديال البني واسماء مامعروفاش.. راجع راسك مزيان ا الوزير وعاونو الناس اللي تضررات بكورونا وكتنتج وكتموت بالجوع – فيديو

مع تسريب الليست ديال الفنانين اللي خداو الدعم هاد العام، واللي وصل لمليار و400 مليون، لاسماء غير معروفة، الفنانة المغربية لطيفة رأفت دارت لايف في الصفحة ديالها على فيسبوك، كتستنكر فيه هادشي، وكتطالب وزير الثقافة باش يراجع نفسو، ويشوف لمن عطى الفلوس، حيت "أغلب هاد الاسمام مامعروفاش وماكتنتجش.. وكاينة شركة دالبني حتى هي خدات.. وكاينة فنانة ساكنة فالقاهرة.. وفنانين معروفين كيموتو بجوع مالاقيينش باش يخدمو فهاد الجايحة وما شافو من عند الحكومة والو"، على حد قولها.
وزادت رأفت كتقول، فالفيديو اللي تبارطاجا على نطاق واسع، أنها خرجات تحتج ماشي حيت بغات الدعم، هي مامحتاجاهش، بالنسبة ليها الدعم كيستحقوه الشباب اللي عاد بداو واللي كيخدمو والفنانين اللي مافحالهمش.
وتابعات: "أنا مايمكنش نسكت على هذشي، ونشوف العسل كيدفكَ فالارض وكيضيع والناس محتاجين ليه.. والفنان اصلا ماعندوش باش يعيش، لا سينيسيس لا تقاعد لا مدخول قار، او شنو بغاونا نديرو بطاقة "راميد" مايمكنش؟..."
وختمات لطيفة كلامها بالقول: "أنا عمري تكلمت بهاد اللهجة حتى لدابا، لذلك كنطالب باش تراجع راسك مزيان ا الوزير، وشوف الفلوس فين كيمشيو، وعتقو الناس اللي كتموت بالجوع !!"