فضيحة. المجلس الجهوي للسياحة ففاس جاب سعد لمجرد اللي متهم بالاغتصاب باش يروج ليه الحركة فالمدينة.. ونشطاء وحقوقيات كاعيين.. وابتسام لشكَر: هذا تطبيع مع ثقافة الاغتصاب

سعد لمجرد جا مؤخرا لفاس، وعلن على هادشي فحسابو فانستكَرام (قبل ما يرجع ويحذف كولشي)، وعلى ما يبدو (من المنشورات) المجلس الجهوي للسياحة هو اللي عرضو، وحط تصاورو فصفحة المجلس الرسمية. وبما ان السيد متهم بالاغتصاب والاعتداء الجنسي فجوج قضايا في فرنسا، بزاف ديال النشطاء والحقوقيين ولي فيمينيست ماتقبلوش هادشي واستنكروه واعتابروه تطبيع مع ثقافة الاغتصاب.
Sending you lots of love and positive energy from Fes one of the most beautiful and fascinating cities #الله_ينصر_سيدنا #saadlamjarred1 #love_my_fans_forever_and_ever #love_my_parents_forever_and_ever https://t.co/tTzA9GZ3EX
— Saad Lamjarred (@saadlamjarred1) October 31, 2020
المجلس كان معتمد زيارة لمجرد كاستراتيجية تواصلية للترويج للقطاع السياحي والسياحة الداخلية وضخ الدماء فيها بعد أزمة كورونا، لكن النشطاء شافو انه مايمكنش لمتهم بالاغتصاب يبان فالواجهة بهذ الطريقة، ويتم الاحتفاء بيه من طرف مؤسسة رسمية على حساب ضحايا الاغتصاب.
وحدة من الصور اللي خدا لمجرد خلال زيارتو لفاس، بان فيها محمد ياسر جوهر، الرئيس ديال المجلس الجهوي للسياحة ففاس، كيعطي فيها هدية للمغني، ومعاه سلمى علوي مدغري ، مديرة الاتصال فالمجلس (وحتى واحد فيهم مالابس كمامتو ومامحتارمينش التباعد الاجتماعي فعز كورونا)، وترفقات بعبارة ثناء وشكر ليه على اختيار فاس كوجهة سياحية.
نشطاء كثار، ومنهم الحقوقية والفيمينيست ابتسام لشكَر اللي عبر "MALI الحركة البديلة من أجل الحريات الفردية" ، تساءلو كيفاش يتم استقبال لمجرد بهاد الطريقة في حين هو مازال متهم الحد الآن فقضايا ديال الاغتصاب.
الصداع الكبير اللي ناض، وتداول الصور على نطاق واسع باعتبارها "فضيحة كبيرة"، خلى المجلس الجهوي للسياحة بفاس يبادر بالحذف ديالهم، وحتى بعض المواقع الاخبارية والصفحات اللي كانت ناشرة خبارات لمجرد على هادشي مسحاتهم، وهكذا لشكَر علقات وقالت "انتصرنا أخيرا..".