وناري هاد الشي كيخلع. هاد 2020 حالفة حتى تصفيها لينا بالخلعة. علاش ما وقفناش رحلاتنا من والى لندن. وزير الصحة البريطاني: السلالة الجديدة من "كورونا" خرجات على السيطرة

اش هاد العام ديال الويل 2020. الاخبار المقودة كتقضي على الاخبار الزوينة. يالله كلشي فرح ببداية القضاء على "كورونا فيروس" مع الڤاكسان اللي بدا من بريطانيا نيت٬ حتى خرج خبار خايب بزاف من نفس لبلاد. بعد تصريح رئيس الوزراء بوريس جونسون وهدر على سلالة جديدة من "كورونا ڤيروس"٬ خرج وزير الصحة مات هانكوك هاد النهار باش يقول ل"سكاي نيوز" راه هاد السلالة "خرجات على السيطرة".
الوزير قال باللي الطريقة الوحيدة للسيطرة على الوضع هي "اجراءات الحجر الصحي". طبعا العالم تخلع. هولندا وبلجيكا والكويت وقفات رحلاتها لهاد لبلاد. المانيا وجنوب افريقيا كيتفكر تتبعهم واسبانيا طلبات من بروكسيل رد اوربي على هاد المستجد.
بريطانيا قالت لمنظمة الصحة العالمية ان "سرعة انتشار السلالة الجديدة أقوى "بنسبة 70%" من السلالة السابقة، وفقا لرئيس الوزراء بوريس جونسون.
دابا حنا عندنا رحلات لبريطانيا وبلادنا ما على بالهاش. خاص توقف الرحلات دابا اليوم قبل غدا. واخا كنطلبو البي سي ار٬ خاصها توقف لايام حتى تكون معرفة اكثر لهاد الڤيروس. واش كيقتل كثر من السلالة الاولى ووو.