بالفيديو. ممثل اسرائيل فالمغرب مللي جا للرباط: المغاربة رحبو بيا وقالولي هذي بلادك وسولوني على الفيزا لإسرائيل

كانت انطباعات ممثل إسرائيل الرسمي فالمغرب، دافيد كَوفرين، مزيانة فأولى أيام مباشرة أعمالو فالرباط، بحيث قال كَوفرين، فلقاء تلفزي ليه على "كان 11" الإسرائيلية، أن ردود أفعال المغاربة كانت زوينة، بحيث بمجرد ما كيعرفوه من إسرائيل كيستقبلوه ويرحبو بيه ويقولوليه "هذي بلادك".
وحسب ما جاء فاللقاء التلفزي، اللي نشراتو صفحة "إسرائيل بالعربية" على تويتر، فواخا دازت أكثر من 20 عام على إغلاق مكتب إسرائيل السابق فالرباط، الممثل الرسمي الإسرائيل تأقلم دغيا، ولقى حفاوة وكرم كبير من طرف المغاربة، كيقول: "حنا هنا بمناسبة مميزة، يطغى عليها طابع الأطباق المغربية الأصيلة، فأعقاب استئناف العلاقات بين البلدين... ماكنتش كنتوقع هذ الاستقبال الحار، ردود الافعال كانت رائعة، وكيف كيعرفونا من إسرائيل كيرحلو بينا".
وزاد كَوفرين كيحكي على تجربتو كممثل رسمي للبلاد العبرية فالمغرب: "حجم النشاط والتعاون هو أكبر وأوسع بكثير مما كان عليه قبل 20 عام.. كلشي المغاربة كيسولوني على الفيزا لإسرائيل، وغير ماتبقاش كورونا وتنطلق الرحلات الرسمية اكيد غنشوفو المزيد من السياح".
وعجبو الحال كَوفرين فاش قال لممثل البروتوكول المغربي أنه هو والطاقم ديالو فرحانين يكونو ضياف فالمملكة، وهو يصحح ليه فالبلاصة ويقول ليه "نتوما ماشي ضياف، هذي بلادكم"، كيف حكى كَوفرين فلقاؤو التلفزي مع "كان 11" الإسرائيلية.