مصادر "كود" من اليهود المغاربة: ماشي كَوفرين بوحدو اللي صوت فالانتخابات البرلمانية الإسرائيلية من المغرب وها شكون صوت معاه.. والمغاربة صحاب الجنسية الإسرائيلية فالمغرب قلال ومنهم اللي روشيرشي – فيديو

افتتح السفير دافيد كَوفرين، رئيس مكتب الاتصال الاسرائيلي فالمغرب، اليوم الخميس بالرباط، صندوق الاقتراع فالبعثة الديبلوماسية، وصوت فالانتخابات البرلمانية الاسرائيلية الرابعة والعشرين كأي مواطن إسرائيلي، لكن من المغرب، وبلا مايحتاج يتنقل لبلادو.
كَوفرين نشر فيديو ليه بشأن تصويتو فالانتخابات من الرباط فصفحتو على "تويتر"، وحسب مصادر "كَود"، فماشي بوحدو اللي صوت، لكن كان تصويتو إيدانا بانطلاق العملية، بحيث كيمكن للإسرائليين اللي خدامين معاه فالبعثة، من ديبلوماسيين ومكلفين بمهام، يصوتو.
pic.twitter.com/Ybqj1hVc1w
— Dr. David Govrin (@DavidGovrin) March 11, 2021
أما بالنسبة لليهود المغاربة اللي عندهم جنسية إسرائيلية، فكتقول المصادر أنهم الوحيدين اللي عندهم الحق يصوتو فهذ الانتخابات، وماشي اليهود اللي عندهم الجنسية المغربية فقط، وكتقول مصادر "كود" أن العدد ديالهم قليل، وماكيتجاوزش 20 فرد أوماكسيموم، وماعندهم حتى علاقة مع السفارة.
المصادر نفسها كشفات أن أغلب الإسرائيليين المغاربة اللي حصلو على الجنسية مشاول لإسرائيل، باستثناء قلة قليلة، منهم اللي رجعو للمغرب مخبيين، بحيث كاين فيهم اللي مامعروفينش وهربو من أحكام تحكمات عليهم فإسرائيل، ومنهم أعضاء فمافيات، أو رجعو تهربا من الضرائب.
والمصادر نفسها رجحات مايكونوش هذ الفئة بالذات جاو للتصويت وهوما ديجا روشيرشي.
أما اليهود المغاربة فماكيزعموش يمشيو لإسرائيل، ويزيرو ما يصطلح عليه ب"العاليا" باش ياخدو الجنسية إلى كانو عوالين يرجعو، حيت هكذا ماكيبقاوش تابعين للكومينوتي والفيدرالية داليهود فالمغرب، وماكيستفدوش من الامتيازات اللي كتوفرها، كتقول نفس المصادر.