واش بصح كاين الزحام فالترانات فزمان كورونا ولا بعض المغاربة ماكيحترموش بلايصهم وتراناتهم.. و"L'ONCF" دايرة جهدها باش تنظم الوضع ؟.. مواطن ل"كود": كندير لاناڤيط بين المحمدية وفاس وديما كنلقى بلاصتي عامرة وكنمشي واقف

دابا مع العطلة الصيفية، كاينين مواطنين كيتشكاو من الفوضى والزحام فالترانات بلا قياس، بنادم كيكَلس فبلايص بشكل عشوائي، وبزاف كيمشيو واقفين ومزاحمين.
واحد من زبناء المكتب الوطني للسكك الحديدية مكرفص بزاف، كيدير لانافيط جوج مرات فالسيمانة من المحمدية لفاس، وقليل فاش كيلقى بلاصة، والسبب ماعرفوش: "اليوم ركبت مشيت لبلاصتي لقيتها عامرة كيف العادة، درت على كل العربات لقيت كلشي البلايص عامرين و تقريبا ما بين 30 حتال 40 راكب واقف فالكولوارات مالاقينش فين اجلسو"، حسب تعبيرو.
وزاد الشاب، فحديثو ل"كود"، أنه تواصل مع مصلحة الزبناء، لكن ماعرفوش السبب، وقالو ممكن الناس اللي عندهم بطائق الاشتراك متيحتارموش القطارات.
وفالأصل، كَاع الناس اللي قطعو البيي ديالهم نورمالمون عندهم بلاصة مرقمة فالتران على حساب الفاكويات، لكن كاين مواطنين كيطلعو لترانات عامرة ماشي ديالهم، واخا الموعد ديال سفرهم باقي بعيد، وكيخلقو نوع من الفوضى.
ومن قوانين السفر اللي فرضاتها "L'ONCF" لتفادي الازدحام أنه خاص المسافرين "يشريو مسبقا تذكرتهم، من اجل ضمان مقعد على متن القطار ومرور سلس بالمحطة"، كذلك بالنسبة للمنخرطين خاصهم "يحجزو مقعد على الأنترنت ويطلعو للقطار السريع أو العربة المشار ليهم فتذكرة الحجز"، وخاص الجلوس "على المقعد الموضح فالتذكرة".
من وقت طويل، المكتب الوطني للسكك الحديدية رقم البلايص فالترانات، وحدد الطاقة ديالهم الاستعابية، ودار حملات توعوية للناس على هذشي، لكن المشكل باقي هو هو: بنادم كيركب فتران ماشي ديالو وكيكَلس فبلايص بشكل عشوائي، حتى كيوقعو هذ المشاكل.
وواخا "L'ONCF" من الضروري تلقى حلول باش مايبقاش هذشي، حتى بعض المواطنين براسهم كيتحملو نصيب كبير من المسؤولية، حيت ماكيلتزموش بأرقامهم، وماكيتسناوش الدور ديالهم للسفر فالقطار اللي مقطعين فيه.
وفبعض المحطات كيتم مراقبة التذاكر ديال الناس بصرامة، باش اللي باقي عليه الحال على السفر مايهبطش للسكة ويطلع فتران ماشي ديالو ويدير الفوضى، لكن هذشي ماكاينش فكَاع المحطات.
و"كود" تواصلات مع مسؤول فالمكتب الوطني للسكك الحديدية على هذشي لكن رفض يتنشر تصريحو.