صحافتنا وصحافة لفرانسيس. كيفاش جاو غير الصحافيين ومشاو مع الرئيس والملك وخداو التصريحات ودارو خدمتهم وكانو فالواجهة ومدراء نشر كانو اللاور ومشاو فالترانات لخراين

اليوم ربيع لخليع باطرون المكتب الوطني للسكك الحديدية دار ندوة صحافية فطنجة. مشاو صحافيين من كازا والرباط فالتي جي في لطنجة للوطيل ودارو ندوة صحافية على قبال التدشين اللي دار البارح وقام بيه محمد السادس وماكرون.
غير قبل ما يعرضو على الصحافيين. المكتب الوطني للسكك الحديدية عرض على مدراء صحف ورقية ورقمية للتدشين البارح. مبادرة مزيانة. غير وكان الفقصة كانت من بعد. البارح كانت اجواء احتفالية والبروتوكول ما كانش مزير. كلشي كان ناشط. الصحافيون الفرنسيون اللي فيهم ليروبورتير والصحافيين المتخصصينس سوا بالمغرب او بالتكنلوجيات الحديثة جاو مع ماكرون فالطيارة. كانو عارفين البرنامج قبل منا. فكود نشرنا البرنامج اللي خديناه من عندهم.
الصحافيون لمغاربة ما كانو عارفين اش واقع حتى خداو البادج. غير خطوط عريضة وصافي. هما تفاصيل التفاصيل عن رحلة ماكرون الى المغرب حتى يرجع.
جا الوقت اللي غادي يوصل المغرب. كلشي داير الصف عاد تم استدعاء الصحافيين. كلشي كان واقف قدام باب لاگار من بعد دخلو كلشي للداخل. الصحافيون الفرنسيون باش وصل الملك وماكرون كانو كيصورو. قراب ليه بزاف. الصحافيون لمغاربة كانو بعاد. فالتدشين كانو قراب وخداو صور زوينة. لمغاربة بعاد بزاف. حقاش كان بروطوكول واخا ماشي مزير ولكن كانت بلاصة ليهم بعيدة على التدشين والكشف على شعار هاد التران.
حتى فالمشية. الصحافيون الفرنسيون مشاو مع الملك وماكرون ومدراء النشر المغاربة بقاو حتى جوج سوايع. اييه مع منتخبين ومسؤولين تغداو فواحد الخيمة وكانو مرتاحين ولكن المجنون على لخبارات فاتو كلشي. باش وصلو لمحطة اكدال شكون كان؟ الصحافيون الفرنسيون. لخليع مع من هدر وهو والوزراء دياولنا والمسؤولين الفرنسيين؟ الصحافيون الفرنسيون.
يعني اللي كان مدعو جا غير للتكبيرة وصافي.
دابا كاين التي جي في للمغاربة ولكن لخبار الاولى خداوها لفرانسيس. دير 320 كيلومتر فالساعة ولا 400 كيلومتر فالساعة ما كتغيرش بلاد ايلى ما تغيرات العقلية. هادا خاصو خدمة كبيرة