واش بسبابو بنعرفة خايف يطيح فسلا.. المعتصم قوة البي جي دي فهاد المدينة مبغاش يترشح للانتخابات

علمت "كود" من مصدر مطلع أن جامع المعتصم، عمدة مدينة سلا، والقوة الانتخابية لحزب العدالة والتنمية فهاد المدينة اللي فيها حضور قوي للاسلاميين، مبغاش يترشح لانتخابات 2021.
المعتصم اللي هو مدير ديوان رئيس الحكومة سعد الدين العثماني، واخا اختارتو لجنة الترشيح مبغاش يترشح، عيا ومبقاش باغي يزيد. طبعا هاد الشخص عندو مكانة خاصة فالحزب، وكان فالحبس قبل 2011، وملي جات 20 فبراير ضغطت قيادة المصباح على الدولة وطلقاتو ومباشرة تعين فالمجلس الاقتصادي الاجتماعي.
هاد الصباح تروج على نطاق واسع عدم رغبة سعد الدين العثماني الترشح للاستحقاقات المقبلة، مصدر قيادي فالحزب نفى يكون العثماني مبغاش يترشح وقال هادشي :"مراوغات سياسية فقط".
العثماني هو رئيس الحكومة، اللي دارها مشكلة داخلية، حسب مصادر الحزب، يلا ترشح فسوس ومجابش الاصوات ضربة ليه وهزيمة قاسية، خصوصا فسوس عندو مشاكل تنظيمية، واذا ترشح فسلا مجابهاش يعني معندوش شعبية وغايبان ضعيف قدم خصو الداخلي عبد الاله بنكيران اللي ديما كيربح وكيجيب الاصوات فسلا.
عدم ترشح العثماني يعني الاعتراف بالهزيمة قبل الانتخابات.