عاجل. الجولة الاولى لانتخاب امين عام البي جي دي تقسمات بين تيار الاستوزار بقيادة ابن عرفة وتيار بنكيران مع الازمي والرميد والرباح كلاو العصا والمفاجأة هو افتاتي

تم قبل قليل فرز الجولة الاولى من التصويت على الامين العام لحزب العدالة والتنمية من قبل المجلس الوطني المنتخب في المؤتمر الثامن للحزب اللي كينعاقد دابا فالرباط. وقد شهدت هذه النتائج تقدم كلا من سعد الدين العثماني اللي جاب 180 صوت والادريسي الازمي اللي جاب 110 صوت فيما حصل عبد العزيز العماري على 60 صوت تلاه الرميد ب47 صوت فافتاتي ب44 صوت فالرباح ب42 صوت ثم جامع المعتصم ب34 صوت وسليمان العمراني ب32 صوت
هاد الشي كيبين تنافس تيار الاستوزار في شخص ابن عرفة ثم تيار بنكيران في شخص عمدة فاس الازمي. كما يلاحظ ان المدافعين على بنكيران جابو نتائج مزيانة. كاين العماري الثالث وجامع المعتصم والمفاجأة كانت عبد العزيز افتاتي اللي جا الاول فالمجلس الوطني اذ حل خامسا بعد الرميد. هاد الاخير هو والرباح والعمراني كلاو العصا مزيان وشعبيتهم طاحت
وعلمت "كود" ان كلا من جامع المعتصم ومصطفى الرميد وعبد العزيز افتاتي وعزيز الرباح وسليمان العمراني وعبد العزيز العماري قد اعتذروا، يعني خرجو من السباق
بعد هاد التصويت كاين ما يسمى بالتداول عند البي جي دي٬ ومدته 5 ساعات وبحضور المؤتمرين لكن غير كيتفرجو صافي حقاش المجلس الوطني المنتخب هو اللي غادي يصوت مرة ثانية على الامين العام. دابا مع انساحب المتنافسين بقى غير الازمي والعثماني.
فهاد الحالة غادية تكون المنافسة ولكن ما كنظنش ان البي جي دي عندو الشجاعة ينتخب شي حد اخر من غير العثماني حقاش بغاوه صحاب الوقت وهاد الشي اللي خططو ليه من الاول. ولكن كيبقى شوية التشويق. تقدر تكون شي مفاجأة