بعدما ناض عليه الصداع.. لوطيل فمراكش اللي منع مغربيات "سيليباطير" يدخلو وياخدو شومبر اعتاذر ولكن الضرر دار وهما رفضو يرجعو يباتو فيه.. هاد النظام فيه تمييز وتخلف وفيه احتقار للمرا وتعزيز لوصاية الراجل عليها

من بعد ما منع ولوج العيالات المغربيات العازبات، اللي مامرافقينش مع رجالهم وعائلاتهم، خرجات إدارة أوطيل "دومين أبيض"، كتعتذر للمعنيين على هذ "التواصل السيء" كيف وصفاتو.
وقالت إدارة لوطيل، فرسالة حطها فصفحة التقييمات ف"كَوكَل"، بعدما كثرو ليه التقييمات السلبية بسباب نظام منع العيالات سيليباطير من الدخول، انها مارداتش البال لهذ الشرط، وأن الجملة اللي كتبها مدير التواصل فالنظام الداخلي للوطيل "بهلان ماعندو معنى"، و"ماكتمتلش القيم ديالنا والقيم ديال العيالات المسلمات فالمغرب والعالم"، حسب تعبيرها.
وقرر لوطيل، حسب الرسالة، يجري على مدير التواصل حتى تتخاذ فحقو الإجراءات اللازمة مع اعضاء الإدارة العامة.
وكاعتذار منها للعيالات اللي ماتمش قبول الريزيرفاسيون ديالهم فلوطيل بسباب هذشي، وحطو تقييم سلبي ف"كَوكَل"، لوطيل قال انه غيعطيهم ليلة فابور على كل ويكاند داز بالنسبة ليوليوز وغشت 2021، حسب الرسالة دائما.
وقالت إدارة لوطيل أنها كتحرس باش مايكون حتى تمييز ضد النساء ففضاءها، وان هذشي وقع بلا ماتكون على علم، وشكرات النساء اللي نبهوها لهذ المشكل.
وواخا لوطيل اعتذر، مازال عيالات فالتعليقات ماعاجبهمش الحال، وكيحطو فالتقييمات السلبية، ومنهم اللي اعتبر هذ الاعتذار غير طريقة لتهدئة الوضع من بعد ما ناض الصداع، وان هذي كانت السياسة الفعلية ديال لوطيل.
ومازال هذ الشط اللي حطو لوطيل منوض حالة على مواقع التواصل الاجتماعي، واعتبروه معلقين كثار أنه اقل ما يمكن القول عليه هو "ميزوجين وإقصائي وفيه عنف كبير ضد النساء وكبح لحريتهم"، وإدارة لوطيل ماحشماتش وحاطة هذ الشرط نوار سير بلون فالريكَلومون الرئيسي ديال الإقامة.
وناس على "فيسبوك" كيتشكاو بسباب هذشي، بحيث تمنعو، وهوما مجموعة من الصحاب ومنهم جوج عائلات، من الحجز فلوطيل، للمرة الثالثة على التوالي، بحجة أن بعض أفراد المجموعة عيالات عازبات من جنسية مغربية.
ومن بعد اعتذار لوطيل، وحدة من المغربيات المعنيات بالامر قالت ان الادارة اتاصلات بيهم وعرضات عليهم يخلصو قل وردو عليها انهم ماغاديش يعاودو يزطمو عندهم. واضافت ليلى ب انهم هما باغيين هاد القانون الداخلي يتبدل ويتقدم اعتذار لكل المغربيات. واكدات ان هاد الميزوجيني كتوقع لگاع العيالات المغربيات. وختمات ميساجها بشكر الناس اللي وقفو معاهم واستنكرو هادشي.
والريكَلومون المتخلف كيقول: "دخول المؤسسة غيكون مرفوض قطعا بالنسبة للعيالات المغربيات اللي مامعاش رجالاتهم او عائلاتهم، وغادي يتطلب منهم يجبدو وثائق كتتبت أنهم مع عائلتهم (وماشي ناس خرين) فالاستقبال".
وحاولات "كود" تتواصل مع إدارة هاد لوطيل، لكن ماكيجاوبوش.