رمضان فالدار. نور الطالبي ل"كود": بقا فيا الحال هاد رمضان ماخرجتش ندير الأعمال الخيرية بسباب كورونا.. ودابا ماشي وقت الماكياج والفشر بالماكلة واللباس

كل يوم "كود" كتسول فنانين ومشاهير على كيفاش كيدوزو نهارهم مع الحجر الصحي فرمضان.
اليوم معانا الراقصة نور الطالبي، اللي أكدات بللي الأمور تبدلات عليها بزاف فهذ الحجر الصحي فرمضان، بحكم أنها كانت مولفة كل عام فهذ الشهر تخرج تفطر مع جمعيات خيرية وتساعد الناس، لكن هذ العام هي مطالبة باش تكَلس فالدار حماية لصحتها وصحة الناس لخرين من عدوى فيروس كورونا المستجد.
كتقول نور: "باش تعيش هذ التجربة ديال الحجر الصحي هي حاجة جديدة، ماشي غير بالنسبة لي لكن بالنسبة للعالم كلو، كاين تغيير كبير فنمط العيش، تغيير فالعادات، تغيير فتصرفاتنا، فقراراتنا، مولفين حنا اللي كنختارو النهار اللي غنخرجو فيه وكنديرو اللي بغينا، دابا لا ملزمين نكَلسو فديورنا، أنا معروف عليا كندير أعمال خيرية فرمضان فسبيل الله، لكن الأعمال بالنيات، وهذ العام بقا فيا الحال لأني مضطرة نكَلس فالدار حيت كورونا كاينة".
بالنسبة لكيفاش كتدوز نهارها، كتحكي لينا نور بللي مكادير حتى شي حاجة مثيرة من غير انها كتوجد شهيوات فالكوزينا على قد المستطاع، وكتقاد شحال من حاجة فالدار، وكتستغل فرصة وجودها مع عائلتها، وكتقول بالحرف: "كندخل الكوزينة، كنقاد اللي قديت عليه أنا وماما، وكنوجدو فطورنا أنا وياها والبنات بجوج، كنقضيو باللي كاين، حيت هذا ماشي وقت بغيت هذي وتشهيت هذي لا، كنوجدو اللي متوفر وصافي، وخلاص كنقاد حساباتي مع الدار، وكنصاوب شحال من حاجة فيها، بالنسبة للتقضية، كنا تقدينا قبل ما يعلنو الحجر الصحي، ودرنا بحساب جوج سيمانات، من بعد تعلن على الحجر الصحي، وبدا الأخ ديالي كيتقضى للدار مرة مرة، وكيجيب غير الأساسيات، انا ماحطيتش رجلي فالزنقة منهار 16 مارس، باش نحمي راسي، ونحمي الغير، وماشي عيب تكَلس فالدار، حيت دابا كلشي كَالس، يا الغني يا الفقير يا أي شخص، والله غالب".
وانتقدات نور الناس اللي كيحطو الطبالي دالفطور عامرين بالمواكل وكيحطو تصاور اللباسات والماكياج "هذا ماشي وقت فشر عليا نفشر عليك وبان عليا نبان عليك، حيت كاينين ناس كَلسو من الخدمة وكيعانيو، احتراما لهذ الأشخاص خاص الناس تفكر فالمحتاجين اللي محتاجين المساندة، وتأجل هذشي حتى تفوت الازمة"، على حساب هضرتها.