بعيوي يعين ويحيد شكون يطلع للتراكتور. حيد وكيلة جهة الشرق واخا تعلن اسمها وتوافق عليها مركزيا

علنات الأمانة العامة لحزب الأصالة والمعاصرة، خلال الأيام الأخيرة، على أن "البامية" نادية بوتولوت هي اللي غا تكون وكيلة اللائحة الجهوية للحزب على مستوى جهة الشرق، غير أن نفس القيادة صدرات بلاغ رقم 4 وقالت بللي هذ المرشحة مسجلة ف اللوائح الانتخابية د مكناس، وراه تم التعويض نتاعها بعضوة المجلس الوطني المحامية حورية ديدي.
"كود" دخلات على خط البيانات المتضاربة واتصلات بحورية ديدي، واللي قالت ف تصريحها ل"كود"، أن الأمور باقي متحسماتش وأنه من هنا ليومين عاد غادي يبان شنو غا يوقع.
ومن جهتها قالت نادية بوتولوت في اتصال لها مع "كود" أنها تفاجئات بالبلاغ رقم 4، حيت قالت أنها كانت هي المرشحة د "البام" على مستوى جهة الشرق، خاصة وأن الحزب قال بالحرف "عقدت اللجنة الخاصة بهذه الترشيحات اجتماعا ثانيا للبت في الملفات المتبقية، وبعد نقاش مستفيض، خلصت اللجنة إلى تزكية إلهام الساقي كوكيلة للائحة الجهوية لجهة فاس-مكناس، ونادية بوتلوت کوكيلة للائحة الجهوية لجهة الشرق".
ورفضات نادية بوتلوت أنها غاتعطي شي تصريح ف الموضوع، حيت قالت كل نقاش والمرحلة نتاعو وبالتالي لا داعي للادلاء بأي تصريح حتى نشوفو شنو غايكون.
ويرى متتبعون بان اللجنة الخاصة بالترشيحات ف "البام" تالفا ليها الجريا، خاصة وأنها ك تنعس وتفيق وتحيد أسماء وتزيد أسماء أخرى، وهاد الشي الليغادي اخلي "البام" اعيش مشاكل داخلية وتكون عندها انعكاسات سلبية على الانتخابات المقبلة.
وفذات السياق قالت مصادر خاصة ل"كود"، ان بعيوي عضو لجنة الانتخابات هو لي كيلعب فهاد الترشيحات، كيفما كيلعب فخارطة الانتخابات فجهة الشرق، هاد السيد لي محكوم بالحبس وخاصو يمشي بحالو كالس كيلعب فخارطة السياسة باش يعمرها بناس ميصلاحوش وماشي غير فالبام ولكن كيلعب فعدة احزاب بسباب ضعف امناءها الجهويين.
دابا هاد بنادم ولى كيحكم حتى فخصومو السياسيين. اييه. فضايح كبيرة وصافي