فضيحة بوزارة الصحة. ايت طالب فتح التباري على جوج مناصب حساسة مرتبطة بالصفقات بالملايير فاليوم الاول ديال مفاوضات تشكيل الحكومة.. ومصدر ل"گود": هادي مناورة باش يتقرب من الاحرار

خالد ايت الطالب، وزير الصحة اليوم دار فضيحة قدها قد الخلا، بسبب اعلانو لفتح التباري على جوج مناصب حساسة فمديرية الادوية والصيدلة، تزامنا مع اليوم الاول من مفاوضات تشكيل الحكومة اللي كيقودها عزيز اخنوش، الفائز بالمرتبة الاولى في انتخابات 8 شتنبر، والمعين من طرف الملك.
وزير الصحة فتح جوج مناصب للتباري اليوم 13 شتنبر، في خطوة اثارت استغراب عدد من المتتبعين، خصوصا وان هاد جوج المناصب عندها علاقة بالصفقات والتراخيص. يعني مناصب مهمة بزاف فتدبير الصحة.
مصادر هضرت مع "گود" وقالت :"كيفاش وزير الصحة فتح غير هاد جوج مناصب للتباري في حين 4 مناصب لرؤساء المصالح خصها تفتح ومنصب رئيس قسم التواصل "، مضيفة :"واش كيعني ان هاد جوج المناصب باغي يتفاوض بهم باش يبقا فالحكومة، كولشي ممكن، خصوصا وانه باغي يبقا".
مصادر مقربة من الوزير كتقول العكس، موضحة :"هادي مباراة عادية، وانا كوزير جيت فمرحلة الجايحة خصني نزل البرنامج ديال مكافحة الفيروس وعندها مشاريع كبرى خدامين عليها".