استغرب قيادي في حزب "العدالة والتنمية"، كيفاش العثماني لي هو أمين عام الحزب، كيقدم مذكرة للعثماني رئيس الحكومة، حول كيفية الخروج من الحجر الصحي. وقال ل"كود" "كيفاش رئيس الحكومة العثماني تلقى من امين عام الحزب العثماني مذكرة دالخروج من الجايحة . راه العبث" العثماني توصل بمقترحات ومذكرات من أحزاب، ولكن فين هي المسؤولية السياسية والحكومية، راه واجب عليه يوجد هو الخطة كرئيس حكومة. مع العلم أنه كاينا لجنة اليقظة كتدبر هاد الأمور. العثماني حاليا كيتضح أنه معندوش برنامج ولا رؤية وكيساين الأحزاب الممثلة في البرلمان تعطيه شنو خصو يدير.. باغي يدير الديمقراطية التشاركية بطريقة عاوجا بزاف. والتأخر ديال في اعطاء حلول ومقترحات وبرامج خلى وزراء تقنقراط ينجحو فمهمتم وبانو بزاف مقارنة مع السياسيين ديال لعثماني. واش العثماني عارف اصلا امتى يترفع الحجر الصحي ولا كان عارف كيفاش دارو التقسيم، اللا.. هاد الاجراءات ماشي ف يدو، وكولشي عارف بلي الداخلية هي لي دارتها مع وزارة الصحة. العثماني كيدير عليها "التغطية السياسية" ويدافع عليها وسط البرلمان، غير هو زاد فالدفاع ديالو فاش مسح بالمنتخبين الأرض وهانهم وتخلا على صلاحيات المنتخبين لصالح الولاة والعمال. واش العثماني مافيدوش ف التدبير؟ حاليا المؤشرات كتقول بلي :"خارج التغطية وفاشل فالتدبير" وفق ما صرحت به قيادات ف أحزاب المعارضة. واش العثماني كرئيس حكومة عندو برنامج خاص باش يدبر ما بعد الجائحة، وكيفاش كسياسي فشل مقابل التقنقراط نجح في مهمة إدارة أزمة "كوفيد" بالبلاد. بي جي دي العثماني باغي إدماج القطاع غير المهيكل وإعفاءات ضريبية و"التغطية الاجتماعية" الشاملة ودعم البحث العلمي، هادشي راه باين كولشي باغي وكولشي عارف المغرب خاصو ينوض يدير صناعة محلية وينتج منتوجات كانستوردوها ويزير من التهرب الضريبي ويدير اصلاحات هيكلية، حيث هادي وقت أزمة. واش هاد رئيس الحكومة صالح يدبر الأزمة؟.. طبعا لا مصالحش حيث ضيف بزاف. من غير قضية واحدة هي أن الانتخابات هي طلعات حزب ديالو، وخصو يتحاسب بالديمقراطية والانتخاب، واخا هو مجابهاش بالانتخاب وكولشي عارف قصة الانقلاب الداخلي على بنكيران وجا بلاصتو.
