توقع. حكومة اخنوش غادية تعين فقصر فاس لخميس

اليوم كاينة انتخابات يختار فيها الناخبون الكبار 120 عضو فمجلس المستشارين باش يكملو اعضاء غرفتي البرلمان. نتائج هاد الانتخابات الخاصة بالغرفة الثانية تعرف اليوم وغدا لاربعا 6 اكتوبر.
وتوقعت مصادر ل"كود" ان يتم الاعلان عن تشكيل الحكومة نهار لخميس 7 اكتوبر. ديك الساعة غادية تكون النتائج النهائية لمجلس المستشارين معروفة وغادي يبقى للافتتاح الرسمي للدورة الخريفية برسم السنة التشريعية الاولي 24 ساعة. الافتتاح غادي يديرو الملك محمد السادس يوم 8 اكتوبر بخطاب عن بعد وفق ما اوضحته مصادر "كود".
الحكومة الجديدة لعزيز اخنوش غادية دار فقصر فاس. وكانت مصادر اوضحت ل"كود" فوقت سابق ان الحكومة يقدر يكون فيها ما بين 22 عضو و24 عضو.
دابا نتسناو التعيين للي اكيد غادي يعرف مفاجئات كثيرة مختالفة على اللائحة اللي كانت كدور على اسماء المستوزرين.