سكوب. عبثية تشكيل الحكومة. بنكيران في تصريح مزلزل ل"كود": كاينة ازمة ووصلنا الطريق المسدود ولا بد ان اصدق مؤامرة السبت 8 اكتوبر واللي كيدير هاد الشي راه گالس كيعلب وزرگ فالسياسة

صافي وصلنا لقمة عبثية تشكيل حكومة بنكيران. الحزب اللي ربح فانتخابات سابع اكتوبر وجاب 125 مقعدا ولى اسير ل20 مقعدا وكلشي سد عليه ورافض يكمل ليه الاغلبية. كان الامل باش تشكل الحكومة قريبا فلقاء عبد الاله بنكيران رئيس الحكومة المعين بعزيز اخنوش رئيس التجمع الوطني للاحرار بمراكش. اللقاء وفق مصادر ل"كود" ما جاب والو. بالعكس سد كلشي ورجع كلشي للاور. حسب مصادر "كود" فان اخنوش مازال على موقفه الرافض للتحالف مع حزب الاستقلال "ولى دابا كيدافع على مشاركة الاتحاد الاشتراكي كاع" يقول مصدر "كود".
ورد بنكيران على هاد المقترح "ايلى ما غيرش موقفو من حزب الاستقلال ما كاين تفاهم" يرد بنكيران في تصريح حصري ل"كود". هاد الشي اش كيعني؟ كيعني ان حتى اللقاءات التشاورية المستقبلية لتشكيل الحكومة ما بقى عندهم معنى "ياك كلشي من الاتحاد الاشتراكي والاتحاد الدستوري والحركة الشعبية ايلى ما كانش الاحرار ما نشاركوش. راه تلاقيت مع رئيس حزب التجمع وكان اللي كان. اذن ما بقاش مبرر نتلاقى معاهم حقاش ربطو مصيرهم بمصير هاد الحزب. انا لن ابدل طريقتي" يشرح بنكيران ل"كود".
هاد الشي يعني انه "كاينة ازمة" يقر عبد الاله بنكيران ل"كود" ويضيف "ماشي انا اللي درتها. حزبنا قدم بزافت التنازلات والتضحيات طيلة الاشهر الاخيرة وصبر بزاف ولكن وصلنا للطريق المسدود" يشدد بنكيران في تصريح مزلزل ل"كود"
بنكيران خاطب من يقف وراء كل هذا وقال في تصريحه ل"كود" "اللي كيدير هاد الشي راه كالش كيلعب وما كيفهمش فالسياسة بل زرك فالسياسة". واكد انه مع "المعقول" والمعقول وفق تصوره "اللي باغي يمشي للمعارضة يمشي للمعارضة واللي باغي يبقى فالحكومة يبقى فالحكومة ولا الاستقلاليين والاحرار ما تفاهموش انا اللي غادي نحسم باعتباري رئيس حكومة ماشي شي حد اخر" يشرح بنكيران.
وتساءل بنكيران كيف تم تغيير موقف هاد الناس من حزب الاستقلال. جابوه نهار 8 ديك الساعة كان مزيان واليوم ولى ما مزيانش" واضاف ل"كود" "في النهاية لا بد ان اصدق نظرية مؤامرة السبت ثامن اكتوبر اللي خرج منها شباط. ما يحدث اليوم يزكيها" . في اشارة الى اجتماع دعا اليه الاصالة والمعاصرة وحضره الاتحاد الاشتراكي والتجمع الوطني للاحرار وكان سيشارك فيه الاستقلال قبل ان يتراجع وتم الاتفاق على اختيار لحبيب المالكي رئيسا لمجلس النواب. وكان حزب الاصالة والمعاصرة نفى ان يكون له يد لا في السر ولا في العلن في تشكيل الحكومة كما ان امينه العام الياس العماري اتصل ببنكيران ونفى له هذا التنسيق القبلي. بنكيران كان هدد بالاستقالة ان تم اعلان رئيس مجلس النواب وقال "هادو عندهم الاغلبية يشكلو حكومة".
بنكيران اكد ل"كود" انه عاجز عن التفاعل مع وسط سياسي مثل هذا. حزب يربط مصيره بحزب اخر. بغينا المعقول وخاصنا المعقول باش نحلو مشاكل بلادنا" يكرر رئيس الحكومة المعين بكثير من المرارة في تصريحه الحصري ل"كود".