قاليهم باغي الاعدام: ياباني مديكَيزي بحوايج الجوكر شير على 17 لواحد بجنوي وسط التران – فيديو

احتفالات الهالوين في الجابون تحولات لروينة و دازت خايبة خصوصا ف نواحي العاصمة طوكيو، بعدما واحد سخن عليه راسو وهجم على 17 لواحد بجنوي.
الراجل اللي قرقبو عليه البوليس، عندو 24 عام، كان داير ماكياج ديال الجوكر وطلع فالتران من لاكَار ديال "كوكوريو" الواقعة في الضواحي الغربية لطوكيو، ف ال8 ديال الليل تقريبا حسب التوقيت المحلي، ومنها بدا الهجوم على الناس.
هاد المصيبة من غير أنه يضرب الناس لاح ليسانس على التران وشعلات شويا ديال العافية ف طرف من التران.
ونشرت مقاطع مصورة على وسائل التواصل الاجتماعي، كتبين درجة الرونية والخلعة اللي تسبب فيها هاد المجرم و بانو عشرات الركاب وهوما كيجريو وكيحاولو يخرجو من التران لبرا ديال لاكَار للنجاة بأرواحهم.
وكالة الأنباء الجابونية "NHK" ذكرات أن المجرم قال للبوليس بللي من شهر يونيو وهو كيقلب كيفاش يقتل شي واحد، بعدما جراو عليه من الخدمة وكَاع صحابو خواو بيه.