رجع القاموس الحيواني للسياسة، شفنا كلاشات بين رئيس الحكومة السابق عبد الاله بنكيران، ورئيس مجلس النواب رشيد الطالبي العلمي، تستعملو فيها تشبيهات حيوانية. بنكيران قال للطالبي نتا غير حميير" فلقاء حزبي . وذلك بعدما كان الطالبي عاود قصة الذيب الشارف لأعضاء حزبو، الطالبي غير لمح ومقالش نيشان لبنكيران نتا ذيب شارف. هاد التنابز معجبش رئيس فريق البي بي اس بمجلس النواب، رشيد حموني، لي صرح ل"كود" بأن هاد التنابز ماشي فصالح بلادنا فهاد الوقت، معبرا عن رفضه "شخصنة" الصراع السياسي . وأوضح حموني ل"كود" :"حنا فحالة حرب مع الوباء وفأزمة اقتصادية وقلة التساقطات المطرية، الوضعية الصعيبة لي كيدوز فيها اقتصادنا، ماشي وقت التنابز بالألقاب"، مضيفا :"المغاربة باغين حلول لهاد الأزمة، ماشي للصراعات لي مافيهاش فايدة". وتابع حموني ل"كود" :"حكومة ومعارضة خصنا نتعاونو نلقاو حلول وهادي ماشي وقت تصفية حسابات شخصية، وخصنا نردو الاعتبار لمؤسسات الدولة وللمؤسسات الدستورية". وشدد المتحدث بلي الحكومة معندهاش اجوبة للأزمة ومبغاتش دير قانون مالية تعديلي ومبغاتش تجاوبنا منين غاتجيب فلوس تكلفة الحوار الاجتماعي ولا فلوس البرامج الاجتماعية في ظل الازمة.