حدث مغربي كبير غادي تحتاضنو فرانسا.. معارض العقار المغربي راجعة من بعد عامين ديال الغياب بسباب الجايحة

العاصمة الفرنسية باريس غادي تحتاضن ما بين 24 و 26 يونيو 2022، الدورة 17 لمعرض العقار المغربي "سماب إيمو باريس"، اللي غادي يدار في المركز الدولي للمعارض (بورت دو فرساي).
الدورة 17 غادي تجي من بعد عامين ديال الغياب بسبب جايحة كورونا اللي ضربات العالم واللي أثرات على عدد كبير من الملتقيات العالمية، هاد العام المعرض غادي يعرف عروض متنوعة للعقار المغربي في عدة جهات، في سياق الاهتمام المتزايد اللي كيعطيوه الجالية المغربية المقيمة في أوروبا عموما وفرانسا بالخصوص، وحتى الفرانسويين اللي باغين يتسثمرو فالمغرب أو يعيشو فالمملكة.
معرض باريس غادي يكون فرصة باش يبين العرض العقاري في مختلف مدن المغرب، ومناسبة لتنظيم جلسات مناقشة مع موثقين مغاربة وندوات عن تمويل البنكي، بهدف تمكين زوار المعرض من الاستشارة والاطلاع بدقة على المحيط الاقتصادي والقانوني المرتبط بالاستثمار في العقار بالمغرب.
سمير الشماع، الرئيس التنفيذي لمجموعة "سماب" (SMAP) قال أن "معرض باريس غادي يشكل ملتقى مثالي للجالية المغربية المقيمة ففرنسا، وللمستثمرين الفرنسيين، وأي واحد كيقلب على عن فرصة يشري دار فالمغرب".
المتحدث قال أن معرض"سماب إيمو باريس 2022 "، هو "حدث كبير اللي كتعرفو فرانسا واللي هو أكبر ملتقى يتجمع فيه، بشكل متزايد، عشرات الآلاف من المغاربة وخاصة الشباب، الذين يعبرون عن رغبتهم في الاستثمار في المغرب".