نزوح جماعي للجنوب.. الترانات عمرو ومواطنين فضلو تران على يمشيو بطومبيلاتهم بسبب الغلاء ديال المازوط

إقبال مكثف من المغاربة على المحطات الطرقية وديال الترانات فالرباط وكازا، الوجهة لي بزاف غادين ليها هي الجنوب، الأغلبية قطعات لمراكش ولا اكادير.
فمحطة التران اكدال، جميع المقاعد المتوجهة إلى مراكش عمرات، بقاو غير شي مقاعد قليلة فالليل.
(م. ا) مواطن عندو طوموبيل اختار يمشي فتران، سولات "گود" علاش هاد المرة اختاريتي التران بلاصت ماتمشي فطريق مرتاح وتوقف وقتما بغيتي، وجاوب بلي هاد المرة مختلفة بسبب الارتفاع الصاروخي لأسعار المازوط وبأن التكلفة ديال المازوط ممكن يشري بها هدايا العيد لعائلتو.
إضافة إلى هادشي كيقول نفس المواطن لي تلاقيناه بأن الزحام لي فالطريق والكسايد كتخليني نفضل تران.
مواطنين ملقاوش بلاصة فتران، ومشاو لمحطة القطار بالقامرة، اللي كتعرف زحام وبعض الفوضى، وذلك قبل أسابيع قليلة من افتتاح المحطة الجديدة لي غاتكون أكثر تنظيما إضافة إلى أنها معلمة أنيقة.