مانكان دارت 40 عملية تجميل وخسرات فلوس صحيحة باش تشبه لكيم كاردشيان وندمات فاللخر

خلصات واحد البنت برازيلية سميتها جينيفر بامبلونا (Jennifer Pamplona) "زبالة" ديال الفلوس باش تولي نسخة طبق الأصل من النجمة العالمية كيم كاردشيان.
جورنال "نيويورك بوست" الميركاني نشر قصة المانكان البرازيلية، وقال بللي هاد الأخيرة خلصات 600 ألف دولار تقريبا على عمليات التجميل، وكان الحلم ديالها هو تولي كتشبه لكيم.
ودارت هاد البنت البرازيلية، اللي فعمرها 29 عام، 40 عملية فمدة 12 لعام، لكن من بعد ندمات حيت ولى كولشي كيشبهها بكاردشيان وحياتها ولات مبازيا على هاد الشبه، وحسات بللي شخصيتها الحقيقية وهويتها كإنسانة تنسات بحال إيلا ماعمرها كانت!
I spent $600K to be Kim Kardashian — now I'm paying $120K to 'detransition' https://t.co/9ElG0QjrvE pic.twitter.com/S6tTVRcJnE
— New York Post (@nypost) July 11, 2022
جينيفر بامبر قالت بللي تغيير شكلها ماوفرش ليها السعادة اللي كانت كتحلم بيها، وولات باغيا تعتق حياتها قبل ماتوصل ل30 عام.
ومن بعد زادت خلصات جينيفر 118 ألف دولار آخرين، باش تدير عمليات جراحية تجميلية أخرى وهاد المرة غير باش يرجع شكلها كيفما كان فاللول!