طلقو فتيحة راه "الاخلال العلني بالحياء" تخربيقة. هاد النوعية مع هادوك اللي كيقولو عليهم مؤثرين خاص جهة اللي تبعهم هي مديرية الضرائب

شي وحدة اسمها فتيحة ساكنة فتمارة شدوها البارح. بناء علي تعليمات النيابة العامة وقفاتها الشرطة القضائية بالمدينة. قاليك "يشتبه في تورطها فنشر وترويج محتويات رقمية بواسطة الانظمة المعلوماتية تتضمن اخلالا علنيا بالحياء".
علاش هاد الشي دارت فيديو بحال الاف الفيديوهات لهاد العينة٬ من التواليط وهدرات على "كاكا". بغات تشرح للي تابعينها وكيشوفوها لون كاكا ديالها. فين مشكل. من حقها.
تشد ايلي كان توظيف للاطفال. دارت فيديو جنسي مباشر بوعي منها ماشي شفرو ليها شي فيديو.
هاد القضية ديال الاخلال العلني بالحياء راها نسبية. اش نا هو بعدا الحياء واش كيعني الاخلال العلني. حتى فقضية هاد البنت راه دايرة قناة والناس كيجيو يتفرجو فيها. يعني هاد القضية ديال العلني ما شادات. ماشي خرجات للشارع العام ودارت هاد الفيديو. صورات وعندها ناس جاو يشوفو.
ما كنعرفش هاد السيدة وما عمرني شفت شي فيديو ديالها. حتى هاد الفيديو ما شفتوش. لكن راه خطير تشدو الناس على تهم بحال هادي فهاد الوقت.
دابا فتيحة ساكنة فتمارة تشدها على هاد الفيديو ونعيمة ايلى كانت فتركيا تتعرى وما يقدر ليها حد. بجوجهم كيوجهو فيديواتهم للمغاربة. كيهدرو بنفس اللغة.
شفت فيديوهات كثيرة لمدعي التأثير كيعطيو الدروس لهاد السيدة. وسيرو كونو تحشمو تفو عليكم. كيدوزو فيديو ديالها باش يطلعو الطرافيك وكيقولو راه حنا ضد هاد الشي وكيسبوها.
راه هاد فتيحة حسن منكم. واضحة ومشات مباشرة للي بغى بنادم. ماشي كيكذبو علي الناس وكيدعيو عليهم.
اللي ممكن تابع فيه فتيحة وهاد المؤثرين هو مديرية الضرائب. هادو كيدخلو فلوس وخاصهم كيخلصو الضرائب. ايلى ما خلصوهاش ياخدو لفلوس من حسابهم ويتابعوهم قضائيا. هادي اه اما الاخلال بالحياء العام راه تخربيقة. مفهموم عام فضفاض ما يمكنش يتحدد. كلها ومفهومو للاخلال. هادا راه تضييق. المتابعة بهاد التهمة تضييق علي الحريات. الخطورة ان شي وحدين قبل طلبو تشد فالحبس. شوفو فين وصلنا. ماشي تطبيق القانون. اللا. تدخل مباشرة للحبس.
اللي خاصو يدخل للحبس هو اللي كيشفر. هو اللي ما كيخلصش الضرائب. هو اللي كيتهرب من الضرائب. وهنا غاديين نشوفو عدد من هادوك اللي بغاوها تدخل للحبس غاديين يكونو فالبنيقة