حزب حاكمو ولد الرشيد وبركة كيتفرج.. الاستقلال ترون وعندو أزمة مالية و12 برلماني من أصل 17 وقعو ضد اللبار باش يتقال من رئاسة الفريق بالمستشارين

علمت "كود" من مصدر مطلع أن 12 برلماني من أعضاء الفريق الاستقلالي للوحدة والتعادلية بمجلس المستشارين، وقعوا على رسالة المطالبة بإقالة عبد السلام اللبار، من رئاسة الفريق.
لي وقعو أغلبية مريحة هوما 12 من أصل 17. دليل آخر بلي تيار ولد الرشيد متحكم فدواليب الحزب.
الحملة اللي بداها تيار حمدي ولد الرشيد، جات فسياق ازمة تنظيمية غير مسبوقة كيعيشها الاستقلال، بعدما فات الاجال القانوني لتنظيم المؤتمر العادي بكثر من 6 اشهر، وبالتالي غايتحرم من الدعم المالي ديال الدولة.
ازمة مالية وتنظيمية زادت خنقات الامين العام نزار بركة، اللي فالحقيقة كيبان غير أمين عام "صوري" والحاكم الحقيقي فالحزب هو ولد الرشيد.
وكشفات مصادر خاصة ديال "گود" ان عدد كبير من أعضاء الفريق النيابي فالغرفة الثانية صيفطو رسالة موقعة لنزار بركة الامين العام كيشكيو ليه من عبد السلام اللبار رئيس الفريق لي بغاو يطيروه.
الناس بالفريق كيتهموه بتلاعبات كبيرة استغل فيها منصبو، وهو فاجآتو الرسالة وخلاتو طالع ليه الدم هاد الويكاند ماعارف فين يعطي الراس.
اللبار حاول الهروب من الاجابة عما تضمنته رسالة الفريق المرفوعة الى الأمين العام، عبر إقحام حمدي ولد الرشيد وميارة للتغطية على غسيله الذي نشره أعضاء الفريق في هذه الرسالة.
الاستقلال حاليا، لا فلوس واجدة ولا تنظيم مقاد، ولا هو فالحكومة ولا هو فالمعارضة، حزب تالف. وزراء وضعاف فالتواصل.