بركة هز يديه.. لغا اجتماعو مع الفريق البرلماني وخلا الكرة بين ولد الرشيد والبرلمانين

علمت "گود" أن نزار بركة الأمين العام لحزب الاستقلال، مغاديش يجتامع اليوم مع الفريق البرلماني للحزب، وقاليهم بلي غادي يتأجل اللقاء إلى موعد لاحق.
بركة كان غادي يتلاقا الفريق النيابي باش يكالمي الصداع لي وسطهم بسبب تعديلات النظام الأساسي لي صادقت عليها اللجنة التنفيذية للحزب ولي كتمنع البرلمانيين يكونو أعضاء بالصفة بالمجلس الوطني.
دبا مور اجتماع السبت لي ناض فيه الصداع، بين تيار ولد الرشيد وتيار نزار بركة، مبقاش معنى يتلاقا بركة مع الفريق البرلماني، خصوصا أن تيار ولد الرشيد المدعوم من قيوح وغالبية أعضاء اللجنة التنفيذية حسمو كولشي وقالو بلي ها التعديلات غايدوزو وسالينا.
الاجتماع المطول ديال اللجنة التنفيذية لي كان البارح، تقال فيه كلام كبير، وقعو فيه مناوشات، ولكن الخطير هو أن نزار بركة عندو غير جوج اعضاء لي كيساندوه هوما نور الدين مضيان وعبد السلام اللبار (رئيسي فريقي الحزب فالنواب والمستشاري). امام هاد الوضع استسلم نزار وخلا الكرة لولد الرشيد.
فهاد اللعب، ماشي غير التيار لي محسوب على الصحراء لي ضد نزار، حتى سواسا ضد نزار، بقيادة عبد الصمد قيوح، هادوك كيعتبرو الحزب ديما كيعطي الحقائب للفاسة، وكيقصي الجهات الأخرى.