المنتخب وجد لكرواتيا فأجواء حماسية ومستعد للماتش باش يهدي برونزية المونديال المغاربة

سالا المنتخب الوطني المغربي الاستعدادات ديالو لماتش تحديد المركز الثالث والرابع فكأس العالم قطر 2022، واللي غادي يلعب فيه غدا السبت ضد كرواتيا.
ودار المنتخب الوطني المغربي هاد العشية، اخر حصة تدريبية قبل المبارة ضد كرواتيا، وركز وليد الركراكي مدرب المنتخب الوطني والطاقم التقني ديالو فهاد الحصة التدريبية ديال اليوم على وضع آخر اللمسات على المجموعة قبل الماتش، وعرفت الصحة حضور رئيس الجامعة الملكية المغربية لكرة القدم فوزي لقجع اللي كان متواجد باش يحفز اللعابا مع العلم أن كل من غانم ونصير مزراوي ونايف أكرد كانوا غابين حيث موعتين، وكذلك عز الدين أوناحي ما شاركش فالتداريب الجماعية.
وقرر الناخب الوطني وليد الركراكي يخلي اللعابا اللي موعتين مرتاحين، ومن المنتظر يعطي الفرصة لعناصر أخرى ما مازال ما شاركت فليماتش اللي فاتو باش يحاول يعوض الغيابات وأيضا يمنح الفرصة لجميع اللعابا باش يبينو القدرات ديالهم، مع العلم أن الماتش كيبقى مهم حيث فحالة الفوز غادي يتوج المنتخب الوطني المغربي بالميدالية النحاسية.