المتنتن".. ها قصة كلاش الستريمر إلياس المالكي للرابور طوطو

الكلاشات رجعات للسوشل ميديا، هاد المرة بين جوج عندهم جمهور فاليوتيب وكيحققو نسبة مشاهدة كبيرة، بين الرابور طوطو والستريمر إلياس المالكي.
القصة بدات فاش الرابور "طه فحصي" الملقب ب «ElGrande Toto» "طوطو" لي حقق نجاحات فمختلف البرامج والمنصات الموسيقية، لاح طراك نهار الثلاثاء 27 دجنبر جبد فيه الياس المالكي، هاد الطراك بعنوان 7elmet ado 6 حيت المعجبين ديالو كايتسناوه كيف ديما فداك الموعد.
الجديد فهاد السنة هو أنه فالدقيقة 4:32 من الطراك، طوطو قال:"قولي شنو غاندير بإنسان كيفيق باحساس وكينعس بالمالكي"، فكانت هاد الجملة هي اللي خلات الستريمر المغربي "إلياس المالكي" (اللي حاليا كيحتل الصدارة فمنصات البث المباشر بارقام قياسية) يعتابرها كلاش ليه حيت جبدو.
ردة الفعل ديال إلياس ابن مدينة الجديدة ما وقفاتش فانه يجاوب طوطو غير فالبث المباشر، بل مشا حتى للحي اللي كبر فيه "طوطو" وهو حي بنجدية فكازا ووثق هادشي بصورة عاد جاوبو بديسطراك كيرد فيه بكل عفوية من بين العبارات اللي خدمهوم المالكي كلمة المتنتن، فهنا بزاف من المعجبين د إلياس نزلو بتعليقات بديك الكلمة فالتراك ديال "طوطو" كتعبير منهم لحبهم ل"إلياس المالكي" اللي كسب محبة و قاعدة جماهرية خيالية بالعفوية ديالو وروح الدعابة اللي عنده.
يشار بلي طوطو فالبدايات ديالو لاح أول طراك ديالو 7elmet ado واللي موراها ولات عادة عندو فكل 27 دجنبر كيلوح طراك 7elmet ado متبوع برقم الترتيب ديالو.
https://l.facebook.com/l.php?u=https%3A%2F%2Fwww.youtube.com%2Fwatch%3Fv%3DDKIgS1NIwxs%26fbclid%3DIwAR2M8OqX4jeEIghW0X51CVxKKiStIcnd584JCVHa3pqyerBp_vlwUlKfgaU&h=AT3FDxzWs-BQLBYGjQ_eRdg8UGZh9V372EWceo9blwbeMzCEqz4mUPXamiXlkqKaFnj5in6TaIrdTyIFYDeDFBckBcXe4AhpoyRqtvxcsl30TYmfBlwUz53ELrZrIvHqltUkVQ