برلمانيون ضد الفن بسباب طوطو.. كيفاش باغين يقيدو حرية الراب لي اصلا خرج من الزنقة وكيعاود على الواقع؟. مصدر بوزارة الثقافة ل"كود": مايمكن إلا ندافعو على حرية الفن

علمت "كود" بأن وزارة الشباب والثقافة والتواصل، مزال ماتوصلات بالأسئلة البرلمانية بخصوص حفل الرابور المغربي El Grande Toto، لي نظمات الوزارة فاطار مهرجان الرباط عاصمة الثقافة، خصوصا بعدما تهجم عدد من النواب على الحفل واتهموا الوزارة بأنها سمحات لطوطو باش يدير الدعاية للحشيش.
الرابور المغربي طه فحصي الملقب ب"الگراندي طوطو" كان جاوب بصراحة بأنه كيكمي الحشيش بعد تلقيه سؤالا حول تعاطيه للحشيش خلال الندوة الصحفية اللي نظمت على هامش الحفل اللي دارو بمنصة السويسي بالرباط.
مصدر بوزارة الثقافة أكد ل"كود" ان الراب فن عندو جمهور ومايمكنش نحبسوه ولا نقيدوه، مضيفا ان طوطو جاوب على سؤال صحافي ميمكنش نفرضو على الصحافيين الاسئلة لي غايطرحو.
وشدد المصدر بلي الوزير غادي يجاوب على الاسئلة الكتابية لي توجهات ليه طبعا، مستغربا يكون حزب تقدمي كيطرح هاد السؤال.
وكان فريق التقدم والاشتراكية وجه سؤال كتابي إلى وزير الشباب والثقافة والتواصل محمد المهدي بنسعيد حول مدى مسؤولية الوزارة للسماح بمغني صرح أمام الملأ بتعاطيه المخدرات وتفاخره بذلك، أن يصعد مسرح المهرجان أمام الآلاف من الجماهير.
"كود" طبعا مع حرية الفن وضد أي تقييد للحرية ولا محاولة للتضييق على عشق الجمهور لفن الراب. الراب فالعالم كامل هو التمرد على كل القيم، وصوت الزنقة، والواقع.