شعلات مابين الوزارة والاساتذة فالفقيه بنصالح.. 8 ديال التوقيفات اخرى فصفوف اساتذة التعاقد وازيد من 300 استاذ واستاذة قررو يعتاصمو ويباتو قدام مديرية التعليم

علمت "كود" من مصادر نقابية، ان العدد ديال التوقيفات المؤقتة فصفوف الاساتذة لي رفضو تسليم النقط، وصل الى 8 توقيفات تم تبليغ اصحابها، ومازال جايين بزاف ديال التوقيفات لاخرين بمديرية الفقيه بن صالح .
مصدر"كود" أكد بلي عشرات الاساتذة فاق العدد ديالهم 300 مشاو تايحتجو قدام مديرية التعليم بالفقيه بن صالح، ولكن ماتحاور معهم تاواحد من مسؤولي التعليم، لي هضر معهم هما الممثلين ديال السلطات.
ويختم مصدر "كود" ان الاساتذة قررو يباتو بشكل جماعي قدام مديرية التعليم بالفقيه بن صالح ، حتى يتحل المشكل.
للاشارة فمديرية التعليم ببني ملال بدورها صدرات مجموعة من قرارات التوقيف المؤقت وتوقيف الاجرة الشهرية فحق استاذة وبعض الاساتذة الاخرين، وهدشي طبعا خلا نقابات تدخل على الخط من بينهم الاتحاد المغربي للشغل لي طلب لقاء مستعجل مع مدير التعليم ببني ملال لمناقشة هذ القرارات.