خلقات أقسام افتراضية.. وزارة التعليم ربطات الاتصال المباشر بين الأساتذة والتلاميذ باش تضمن قرايتهم عن بعد

علنات وزارة التربية الوطنية والتكوين المهني والتعليم العالي والبحث العلمي بأنها طلقات، ابتداء من اليوم الاثنين 23 مارس، منظومة taalim.ma، اللي فيها الخدمة التشاركية teams ، واللي مدمجة فمنظومة مسار، باش تمكن الأساتذة من التواصل المباشر مع التلاميذ ديالهم، وبالتالي تعليمهم عن بعد.
وأكدات الوزارة، فبلاغ ليها توصلات "كود" بنسخة منو، بللي هذ المنظومة عبارة عن أقسام افتراضية كتخلي التلاميذ يستفدو من العملية التعليمية من خلال تقديم عروض أو نصوص رقمية أو تقنيات الصوت والفيديو.
وفالمرحلة الأولى غيستافدو فقط تلاميذ السلك التأهيلي والثانوي الإعدادي من هذ البلاطفورم، وفالأيام المقبلة غيتم تعميمها حتى تشمل السلك الابتدائي حتى هو.
وبالنسبة للأساتذة اللي عمرهم دخلو لهذ المنظومة، غادي يتكلفو مدراء المؤسسات التعليمية بإعطاءهم البسودويات ديال ليكونط ديالهم مع الرمز السري، وحتى التلاميذ غايمكن ليهم يدخلو لليكونط ديالهم من خلال الرقم ديال مسار.
وللإشارة، فالوزارة خصصات مجموعة من المواقع لتعليم التلاميذ عن بعد، من بعد ما تم منع القرايا فالمدارس، بسبب انتشار فيروس "كورونا" المستجدد اللي قتل آلاف الأرواح عبر العالم.