حرية التنقل غير مكفولة فمطار الداخلة!. السلطات استغلات اجراءات محاربة كورونا والحريگ وخرقات الدستور ب"التعليمات".. لي عندو لاكارط ديال جهة بني ملال خنيفرة مايدخلش للمدينة وْكيحققو معاه المقدمين والبحارة كيتسخسخو ويتمرمدو وشحال من واحد رجعوه للدوار

الفصل 24 من الدستور المغربي فيه أن حرية التنقل عبر التراب الوطني والاستقرار فيه، والخروج منه، والعودة إليه، مضمونة للجميع وفق القانون، ولكن فمطار الداخلة حرية التنقل ولاتْ مقيٌدة ب"تعليمات" مفروضة على أعوان السلطة باش يطبقوها بحذافرها، كيفاش؟.
نهار جوج فشهر يناير انطلق موسم صيد الاخطبوط الشتوي فالداخلة، وفهاد الوقيتة كايجيو مئات يْلا ماقلناش الآلاف ديال البحارة من مختلف المدن المغربية للداخلة، وخاصة من مدن الفقيه بن صالح وقلعة السراغنة وخريبكة والنواحي، وهوما لي معروفين كيخدمو فالبحر فالمنطقة هادي سنواات، وعندهم ممتلكات وقوارب ومستودعات ديالهم فالمدينة، ولكن هاد العام سلطات الداخلة استغلات
التدابير الإحترازية لمواجهة فيروس كورونا والإجراءات لي دايراها الدولة لمواجهة ظاهرة "الحريك" لي تفشات فالمدينة خلال ال0ونة الأخيرة، وحدات واحد الموظف فمطار الداخلة هو ومجموعة من أعوان السلطة دايرين شرع يديهم، كيوقفو گاع المسافرين لي عندهم بطائق التعريف ذات ترقيم جهة بني ملال خنيفرة، ماكيخليوهمش يدخلو للمدينة، وخا كايكونو جايين مع الكاشطورة وصاحب الفلايك لي غايخدمو معاهم، وكيطالبوهم بورقة التنقل، وكيسخسخوهم ويمرمدوهم.
مالك لقوارب الصيد التقليدي قال فتصريح ل"كود" جايب معايا بزاف ديال ولاد الدوار كانو مشومرين غير گالسين، جبتهم يخدمو معايا فهاد موسم الأخطبوط، الدراري لي جاو فالطريق وصلو بقرية الصيد تشيكا، وخمسة ديال الدراري جاو فالطيارة سخسخوهم فالمطار وقالو ليهم جايين تحرگو ماشي نخدمو فالبحر، طلقو جوج وثلاثة رجعوهم لدوار، وهوما مساكن جايين يخدمو على والديهم.
بزاف ديال الناس فالدواور ديال جهة بني ملال خنيفرة لي كل عام كيمشيو الداخلة يخدمو فالبحر، هادي شحال وهوما جالسين لا خدمة لا ردمة بسبب كورونا، مشاو دابا للداخلة يدبرو على طرف ديال الخبز فهاد الوقيتة ديال موسم الأخطبوط باش يعيلو عائلاتهم حتى كيتفاجؤوا بتوقفيهم والتحقيق معاهم من طرف أعوان السلطة فمطار الداخلة، فين غادي، و0ش جاي دير، وشكون جابك، وعيط على لي يجي يدير ليك الالتزام باش تدخل المدينة، وتلميحات أخرى بلي راهم غاديين يحركو لاس بالماس.
كاين لي كيفكها وكيطلقوه يدخل للداخلة ويمشي يخدم على راسو، وبزاف كيمشيو لقرى الصيد، وأغلبية الشباب كيجمعوهم وكيرجعوهم المدن ديالهم فالحافلات.
مزيان الإجراءات لي دايراها سلطات الداخلة باش تحارب الهجرة السرية لي تفشات بزااف خلال الأشهر الاخيرة، ولكن خاص إعادة النظر فطرق تفعيلها راه مايمكنش أن موظف أو عون سلطة يبقا يوقف المسافرين ويحقق معاهم وهي لي خدمات البوليس، فقط حقاش عندهم بطاقة تعريف ديال جهة بني ملال خنيفرة، راه يلا يوقفو شي وكيل ملك ولا قاضي ولا مسؤول ولد الفقيه بن صالح ولا بني ملال وتقولو عطيني ورقة التنقل ولا تلمح ليه بلي غادي يحرك غادي توقع كارثة بحال لي وقعات فطنجة بين وكيل الملك والمخازني.