قصيدة نارية للشاعر احمد حمدي إبراهيم

كلمتين قبل المناحرة
يا امة لو هتانتخي
خليكي فاكرة
كل اخ عربي اخي
كل اخ عربي اخي
كل اخ عربي اخي
الا المصري
هنولى عليه حكام يخونوه
و يبيعوا حضارته و اللي جابوه
و ان فكر يوم يعمل ثورة
هنشده لحسبة
تراباتاتوو
الرز اسلوبنا السخي
كل اخ عربي اخي
الا اليمني
ايش فيك فقرك بيكدرني
عاوز تاكل ايه غير قات ؟
سلم نفسك تبقى حبيبي
و اتنازل عن كل الثروات
انا شايلك ف دولاب الصيني
مجاعات اطفالك على عيني
صنعاء لا تتألمي
لكن توازنا الاقليمي
يتطلب ان تتمسخي
كل اخ عربي اخي
الا الصومالي ؟
ياكلوا بعض عادي جدا
انت مالك
و انا مالي
الضرب مش طايل عيالي
السلاح لساه بخيره
و ان خلص نجيبولها غيره
اقطعي العلاقات ما بينا
اضطرابك بره عنا
و ف صراعك مخمخي
كل اخ عربي اخي
الا السوري
ممنوع يخش عندنا
نشوفله دولة تقبله بعيد عننا
مش عاجبه يرجع للاسد
و الصراع يزيد و يكبر
يكش تولع للأبد
اقتل و قول الله اكبر
كل تجار السلاح ببجربوا
احدث الصيحات ف اقليم الشمال
اجيال بتدفع ف الفاتورة
وهم من ايام جمال
دمشق لا تتدغدغي
كل اخ عربي اخي
الا الليبي
ليبي يعني الثروة عندك لسه بكر
فيك الطمع و الخير معاك يبدو كبير
خدلك من البترول بيرين
و هاتلي بير
قطعوا بعض و تعالوا
نشتري منكوا السواقي
ثورتوا ع الوهم القديم
جيبنالكوا حفتر
يحرق الامل اللي باقي
فيكي حتى تتمحي
كل اخ عربي اخي
كل اخ عربي اخي
الا العراقي
ابعتوا هاتوا احتلال
غموا عينكوا بالعقال
اطرحوا احلامه أرضا
و بحصاركم افقروه
في سبيل النفط
عيشوا و اقتلوه
قسموا بينكم نفوذه
قطعوا اوصاله عادي
اعملوا الودنين عجين
طنشوه لو يوم ينادي
بغداد عاصمة الخلافة
لسه فاكر ؟
كان زمان
القصف بالطيران لطافة
و بو غريب
محجوز لعشاق الأوطان
كل أخ عربي أخي
الا اللبناني
اللبناني ده قصة كبيرة
فاكر نفسه هيعصى علينا
عامل نفسه اوروبي و فاهم
اصحى يا زلمة متبقاش واهم
الحرية ف بيتك بس
ويا ولادك .. عند الدانس
انما شعب و اراء
كل هذا كلام هراء
احنا دولة طوق مهمه
تمويلاتنا للهلمة
و الخناقة عندنا و الفوز لهم
و احنا برضه خسرانين
شعب مين ؟
بيروت يا ست الدنيا
هو انت لسه بتحلمي ؟
كل اخ عربي اخي
الا القطري
قبل ما تكمل كلامك
احذفوا شارة الجزيرة
ليه تذيع اسرار خطيرة ؟
يعني ايه مهنية اصلا ؟
المصداقية ف الحظيرة
الدواجن يزعلوا
حذاري من بطش الكبار
اضعف الايمان هنعلن
اضطهادكم و الحصار
غمضوا عينيكم تعيشوا
افتحوا الكاميرات
هنعلن حربنا بالاغنيات
يا امة ضحكت
عليها كل الخواجات
ظبطي المقادير و يلا طبخي
كل اخ عربي اخي
كل اخ عربي اخي
مش هي دي القصيدة
المناسبة يا خال
كل اخ عربي اخي
طلعت مقولة شمال
وطني حبيبي الوطن الأكبر
دق طبول الحرب و عبر
عن احلام معظم حكامك
حاصر دبر اقتل هجر
جوع يمنك خون لبنانك
ضيع تونس و اصنع داعش
اشعل نار الفتنة ما بين
جزايرك و مراكش
اوعد مصر بنفس مصير
العراق و الغالية سوريا
اقطعوا رووس الشباب
اللي عايزنها يوتوبيا
وطني يا زاحف للطائفية
شيعة و سنة و كردستان
تتحاور مع تل ابيب
تقتل ف حماس و الاخوان
وطني يا قلعه للعبودية
الاستعمار سابلنا حرامية
تاجروا ف احلام الملايين
من امتى بترسم امريكا
خطواتنا الجاية
رايحة لفين ؟
وطني يا مالك كل الارقام
حكام بتمسح بيك بلاط العم سام ؟
يا بخت زعماء الصهاينة بأنظمة
اسود علينا و عندهم خدام
#كل_اخ_عربي_اخي_الا ؟!
#احمد_حمدى_إبراهيم