ستربتيز مغربي محترم

مؤخرا واحد الفنانة مسكينة جاها الصهد فوق خشبة المسرح اللي ماكانش مكيف يمكن (لااا ماشي جوانات وااالكليماتيزور)، المهم الممثلة ديالنا تعارات... نووووو!! بقات بالملابس الداخلية بلا حيا بلا حشمة بلا تامغربيت، قالك آسيدي شي كلمات فالسيناريو ماكاينينش فالقاموس وخص ضروري تعبر عليهم بالجسد ديالها!!!
ناس اللي كانو حاضرين مافهمو والو تلفولهم النوامر، واش داخلين يتفرجو عرض مسرحي ولا يشوفو ستريبتيز مغربي محترم، كاين اللي عجبوا الحال وزاد الإهتمام ديالو بالمشهد ويمكن عرف حتى المركة ديال السليب وكاين اللي مشى يشري مونادا باردة !! وكاين اللي بغى يغير المنكر بأضعف الايمان!! ونسى المنكر اللي عندو فالدار فدوك القنوات الممتعة.
أوكي أرنا دابا الرأي العام والمخلويظين والنقاد والفهايمية أشنو قالو كاين اللي شاف داك الشي وصنفو مع الفن والتعبير بالجسد وكاين اللي قال هذا هو التقدم والتحرر والعولمة والشفافية وكاين اللي جمع الممتلات المغربيات اللي تعراو وبانو في مشاهد ساخنة فحال للاهم عايشة الدويبة وقال بأنهم كايجرييو وراء الشهرة والربح السريع وكاين اللي قلبها داعية وقال لعنة الله وعليها إلى يوم الدين!!!
سيادنا مانتسرعوش فالحكم ومانساوش اللي عندنا في الشواطئ والفنادق ووو ...وإلا جينا نغيرو المنكر خسنا نبداو بباب دارنا أما لطيفة أحرار راه حرة تعمل مابغات حياتها هديك وحرفتها هديك وحتى حد مابزز عليك تفرخ فيها وأقول قولي هذا وأختمه بالله يلعن اللي مايحشم