مفهمتش انا هاد الزهر ديالي مالو شاد معايا الضد كاملين الأساتذة عندهم عطلة والمدارس مسدودة والناس مرتاحة وخارجة تبدل الجو غير أنا اللي خاصني نخدم زعما حنا اللي كنقريو فأقسام التربية غير النظامية بوحدنا اللي نخدمو وزيد عليها 40 تلميذ فأكثر والمصيبة من العام اللي فات مخلصوناش ومنين كنطالبو بالمستحقات ديالنا كيقولولك السيولة مكيناش وغير صبرو الوزارة ديال التربية الوطنية عارفة بلي ممخلصينش غير صبرو..ايوا راه الصبر كيدبر انا عيييت بزاف ،كنقري قسم فيه 3 ديال المستويات الابتدائي،وتلاميذ فالإعدادي،وعندي حتى الجذع المشترك والأولى باك ،وحتى التلاميذ غير الممدرسين،واستعمال الزمن كندرس فيه صباح وعشية،وزيد عليها أنني ساكنة فمنطقة نائية يعني من سلوان حتى للناظور 1h25 دقيقة ونتمشا 35 دقيقة حتى للطريق عاد نركب وكنوصل مهلوكة ولكن معليهش المهم نقري التلاميذ ديالي،اصلا هما كيحسو بيا ،والمعضلة ان الموظغين اللي فالمركز موفرين ليهم السكن،الماء والكهرباء كولشي على حساب الدولة وكينعس وكاع ممسوق ومنين نتا تمرض يقولك ايوا الانسان خاصو يتحمل المسؤولية،اودي الله يلعن اللي ميحشم،،ولكن الحمد لله أنني مفتخرة بكوني قريت تلميذات فالمناطق النائية وراهم دابا فالثانوية،وتلميذة ديالي اللي انقطعات من 5 ابتدائي وقرات ودابا راها ف الثالثة اعدادي وحصلت على المراتب الأولى في القسم،والحمد لله منين كنتصادف مع والديهم وكيدعيو معايا وكيعنقوني،الأجمل أن هاد الفئة باغية تقرا وتثبت راسها فواحد الدولة اللي مهمشاهم ومهمشانا،،، أما هاد السنة فالتجربة ديالي غريبة بزاف كنقري تلاميذ من نوع خاص فمركز حماية الطفولة، المهم أنني كسبت الاحترام والتقدير ديالهم والناس اللي كيعرفوني وحتى الأساتذة المتمرسين كيقولو لي كيفاش كتقريهم راه صعاب بزاف ويقدرو يضربوك ويتكرفصو عليك،لكن جوابي هو احترم تحترم، وكيقولو دير الخير تلقاه،ربي كبير واخا عييت بزاف وصحتي تراجعات،ونفسيتي كتأزم حيت مقدرا ندير والو لهاد الفئة اللي كتعاني فصمت،ولكن بنيتي كنخدم ومكنغش وربي شاهد.. غدا أمام الله كل واحد غادي يتحاسب والإشكال هادوك اللي كيغشو فين يديرو وجههم قدام الله. راه ماشي ضروري تكون كبير باش يكون عندك ضمير راه ربما انا صغيرة عليك وكنخدم بضمير حيت كلشي راه كيتسجل علينا.وانتا طول اليوم كترفع فشعارات اللي اصلا خاوبة بحالك،والشعب راه واعي راه مكاين لا حقوق الانسان،ولا ديمقراطية،اللي كاين ولدك كتقريه فمدارس كلاس وكتوفرلو كلشي واصلا بلا ميقرا راه غادي يشد بلاستك،اصلا حتى الخدمة ولات بالخلافة.. المهم معاناة كنعيشوها،تحية عالية لأساتذة التربية غير النظامية،وللأم ديالي حبيبتي اللي ديما واقفة معايا منين كنمرض وديما بجنبي،الله يقدرني يا لحبيبة نجازيك ونحققلك حلمك وتزوري قبر النبي، الله يطول فعمرك يا نور عيني،أنا بلا بيك منسوا والو. نتمنى ضمير هادوك الناس يتحرك ويشوف ولينا حل لكن يقول المثل "الذي يشعر ليس كالذي يستشعر.
