هزما سلكاتهوم، وخنا نقصات علينا تمارة ديال التنقل حتى لعندهم. دردشة التلفون متواصلة معا مشاهيرنا اللي كنخسرو عليهم هاد الجوج دريال ديال آلو في سبيل الله، نعرفو فيها غير شنو واقع عندهم بالتحديد. تبعو معانا واللي تقلق ما يضربش راسو معا الحيط. راه غير غادي يتفلق. * الحسين برافو على هاد الشي اللي داير معا الفتح. ** الله يحفظك آصاحبي. عاجبك الحال؟ * بزاف، عرفتي من فوقاش ما شفنا الربح؟ هادي راه شي تمن سنين وحنا ماكين غير الخسران المبين. ** باش تعرفو بأن السي علي والسي منصف والناس اللي معاهم جايبين لكم الخير غير نتوما الله يهديكم وصافي ماكتصبروش على رزقكم. * فعلا. ** وزايدون واحد القضية كتديرو بحال يلا ماكتعرفوهاش، أي فرقة مزيانة خصها ناس أقوياء يكونو موراها. * راه ما قلنا والو أسي. ** لا حاس فهضرتك أنك باغي تقول شي حاجة. * بالعما أنا مللي ربحتو لينا التوانسة والله مانعاود ندوي نهائيا. ** إيوا هاكاك. * غير هو واحد السؤال: علاش ماتديرش هاد الشي معا الخميسات؟ ** مايمكنش ألهبيل. الخميسات كنا غاديين نديو البطولة وقالو لينا لا أوهو، مستحيل، يلا بغيتو البطولة خصكم فريق كبير. * مافهمتش ** حيت الكرة فالمغرب ماشي غير آجي وربح شي حاجة. لا، الكرة فبلادنا خصك بزاف ديال الحويجات عاد تقاد المسائل ديالك خصك تعرف منين تبداها ومنين تساليها، وتعرف اللي ليك واللي عليك. وتكون محزم ومرزم باش الناس يعولو عليك بحال هاد الشي اللي واقع للفتح دابا. * وشنو الآفاق المستقبلية ديالكم؟ ** دابا حنا يلا بقينا غاديين على هاد النيفو وكنربحو كلشي والماتشات المؤجلة خدامة ما غاديين نوقفو حتى لكاس العالم، تماكينا نديرو الفران، وشوف تشوف عاوتاني.
