سيتم حجب هذه الصورة تلقائيا عندما يتم الإبلاغ عنها من طرف عدة أشخاص.
حتى حنا العيالات بغينا حقنا فالمرافق العمومية !واش كانضحكو على السعودية لي ماكايخليوش العيالات يسوگو الطوموبيلات و حنا مازال عندنا المرا كاتخاف تمشي لجردة و لا بحر بوحدها ؟
لا كنتي مغربية و بغيتي تخرجي نتي و صحابك و صحاباتك لشي مكان عمومي وسط المدينة و تديو الماكلة ديالكم و الموسيقى و تدوزو شي سويعة و لا جوج ناشطين بلا ماتخسرو فلوس بزاف فين تقدرو تمشيو ؟ واش عندكم هاد الحق و لا ماعندكمش ؟ واش المرأة المغربية عندها نفس الحق في استغلال المرافق العمومية فحال الذكر ؟! نظريا البلايص ديال الاستمتاع و "شمان الهوا" واخا قليلة و محدودة و لكن كاينة ! كاينين الجرادي وسط المدينة و كاينين الغابات على برا ، كاين البحر فالمدن الساحلية، الضايات، الويدان …! و لكن حتى وحدة بعقلها اليوم ماغادي تهز شي سربيتة و توجد شي سوندويتش ديال الطون و ماطيشة و تخرج تتشمش فجردة مردوخ فكازا بوحدها و لا هي وصاحبتها! حيت تقدر تحط داكشي و تتجبد فوق السربيتة و دير الموسيقى فودنيها و تحاول ترخى و تتشمش و لكن غالبا غادي تفيق تلقا شي بعرور مجبد حداها كايلعب ليها فشعرها و كايفرنس" مال الزين جالس بوحدو ؟" " وا غا عطيني التيقار آ بعيرير "و هادا أخف الأضرار حيت تقدر تشفر، يتحرشو بيها ، تغتاصب، مهم غادي تجلس مبرزطة و تاواحد ماغادي يقيلها حتى غادي يطلع ليها الدم و غادي ترجع للدار تشمش فالسطح حيت اليوم المرأة المغربية ماعندهاش حق باش تستاغل المرافق العمومية للتسلية ! و واخا كانضحكو على السعودية لي ماكايخليوش المرا تسوق الطوموبيل و كانعيقو عليهم بديك القضية ديال المرأة المغربية أول امرأة عربية تسوق القطار ! و أول امرأة عربية تسوق الطائرة ! راه تاحنا عندنا ف 2017 المرأة المغربية ممنوعة من استغلال المرافق العمومية للتسلية ! ماعندهاش الحق فالجردة و الحق فالبحر و الحق فالغابة و الحق فالواد و الحق فالضاية بوحدها بلا مادي معاها ربعة ديال الگاردكورات يعسو عليها ! ماعندهاش نفس الحق لي عند راجل باغي يخرج يشم الهوا ! هي لابغات تشم الهوا و كانت مزلوطة خاصها تطلع للسطح و لا يخرجها الراجل. هاد عدم الاستمتاع بالمرافق العمومية و سيطرة الذكور عليها راه من العوامل لي كايعطيونا شعب معاق ماكايعرفش يستمتع بالحياة و كايصحابو بلي ضروري يكونو عندك بزااااف ديال الفلوس باش تستمتع بشي حوايح بسااااط فحال جردة عمومية! حيت الجرادي و الغابات و الويدان دارو باش نتشاركوهم كاملين ! و عندنا فيهم الحق كاملين ! عيالات و رجال !صغار و كبار ! لي بغا يمشي يشم الهوا يشمو ! لي بغات تمشي تتسنط للموسيقى تتسنط ! لي بغا يمشي يتلاقا مع صحابو ! لي بغاو يتغداو مجموعين !! كلشي خاصو يهبط للمرافق العمومية و يستاغلها! و يستمتع بيها ! الكيفية ديال استغلال المرافق العمومية تيرموميتر ديال الشعوب ! و القدرة ديالها على التعايش مع الآخر لي مختالف عليها، مختالف عليها فالجنس و فاللون و فالدين و الاختيارات ديال الحياة حيت فاش كايجلس واحد لحيا هوا و مراتو و ولادو كايلعبو حداه و كايجلسو حداهم رباعة ديال ليجون طالقين الموسيقى و كايضربو بيرات باردين و كايجلسو حداهم جوج بنات كايتشمشو و كايهضرو هادشي كايعني أنه دوك الناس طلعو من السطاد ديال التهيميج و وصلو للسطاد ديال الانسانية ! التشارك، le partage, فهمو بلي كلهم عندهم الحق يتشاركو فالبلاد. لا شفتي شي بلاد الجرادي ديالها مسيطرين عليهم غي الرجال غاتعرفها بلاد مازال المرا فيها كاتحسب بهيمة ماشي بنادم ! و لا شفتي الجرادي ديال شي بلاد ماقادرنيش يتشاركو فيهم جميع فئات المجتمع عرف راه أصلا بلي هاداك ماشي "مجتمع" غي مجموعة قبائل بدائية كونما المخزن كوراهم كايتقاتلو كي الهيماج ! بلا ماتحتاج تقرا الدستور ديال شي بلاد باش تفهم شنو طاري فيها و بلا مانساينو يجي البنك الدولي يقولينا المغرب معطل بميتين عام على أوروبا ! خرج غي لشي جردة و غادي يبان ليك واش كاينين مبادئ الاحترام و التعايش و التشارك و لا ماكاينينش.
