عْرِيسْ الجَنَّة

اللَّه اللَّه
مَا حْلاَها في لْسَانْ كَلمَة الله
اللَّه اللَّه
ياك آخرْتُها ملقى اللَّه
اللَّه في سَاعَة الخُوف أَمَان
اللَّه في سَاعَة الحق إيمان
اللَّه عليك يا شهيد
يا عْريس الجنَّة
يا اللي مابَاع فِينا مَا شْرَى
بدَمُو الغَالِي ما بخل
عْلَى تراب أرض الاطْلس
لِيل ونْهَار
عْلى رَاية العَزْ
يْبَات ويْظَل عَسَاس
حَامل عُمْره على كفو
مَا يخاف المُوت
عَاشق الشْهَادة
لاَبَس عْلى الدَوَام كَفْنُو
مَا بَاغِي وَالُو منْ لبْلاد
بَاغِي الفَرْحة
تَرْسم في عْيُون لَوْلاد
مَابَاغِي وَالُو منْ لَوْلاد
بَاغيهم يْكونُوا رْجَال
يعرفوا آشْ يَسْوى شَانْ لَبْلَاد
زَغَرتُوا يا لمَّات
زَغَرتُوا يا لبْنَات
شْهِيدنا حيْ يَتنزه بين الحُوريات
الليٍّ كذب هاذ لحقيقة وقال خْيَال
يَرْجع يَقْرا بمهل ودْمُوع لقُران
يَتْهن ويْغُوص في مْعَاني سْطُورو
يَدْرَك ويَفْهَم سْرَار حْرُوفو
الشَارقة بشمس الكُون بُرْهَان
عْريسنا زاهي فَرحان بمقَامو
مَاعمرو رْكَع ولا حْنى الرْاس
كيف الجْبَل الشَامخ ما يْحَرْكُو رِيح
نَخْلة مَا يْهَزهَا بَارُود ولا قُرْطَاس
شَلّا رْجال مْشَات
شلّا حْبَاب كَفات
كِيف لْحطب كَانُوا فِينا
تحركوا بَاشْ ندفَاوا حنا
سَافْرُوا بَاشْ نَحْيَاو حْنا
واللِّي غير حَالي
شَفْت ونظرتْ بْعيُوني
الشْمَايت والرْعَاوِين
ولاوا فينا سَادَات
ورْجَال ما مْثلهُم رْجَال
عْطاوا لَبلاد الرّوح وما غل
ومَا كَالُوا دمْنا شْحَال سْوى
بين دفُوع ورْجُوع لبحر
سْمياتهم من رْمل شط خْواطرنَا محات
وَفِي لحْظَة مَاهِي نُوم ماهي فْيَاق
لاح في البَال زين الشُهادى
دَمُو عْليه يا نَاس شَاهد وناطق
الكمدة بين لحْديد ولمطَارق
والرُوح لَعْزِيزَة فرفرت
فُوك لسْوار وطَارت
كَالْ كَلمَة زعزعت لَرْكان
كَالْ كَلمَة قبلت عْبَار الميزان
كلمة ريحها حْجَر
كلمة مَاهَا بْحر
حَيْدُوا لعْصَابة عْلى رْمَاقي
عدْمُوني وشُوفْتي
مْعَانكة سْما بْلاِدي
الله عليك يا الطير الُحر
شَلاَّ مْثَاله كْثر
شَلاَّ بْحَاله نَذْكر
بهم نْفَايشْ ونفْخَرْ
خَلاَوا يَدْ الجَلاد تَرْعد
خَلاوا لَعْدُو عْلِيهُم يَشْهَد
شَتى هاذ الناس
شتِي شْحَال كْبَارْ هَاذْ النَّاسْ
بهم بْقَات لَبْلاد رَافْعَة الرَّاس
وبْنِيهَا وَاكفْ عْلَى صَّحْ وسَّاسْ