عداوي 1 ... اكتشافات آدم

دابا نبداو من الأول من أول الدنيا من بداية المحنة ديالنا ملي جينا للدنيا.
بداية السقوط La chute. الزلكة الأولى، طحنا من الفوك، خرجنا من الجنة.
بونا آدم وامنا حوا خرجو الله كريم. زبطين، حينت ماكانوش المايوات ديك الساعة.
اكتشفو عورتهم.
أدم اكتشف العورة والعورة اكتشفت أدم.
حوا خرجت من أدم، كيكولو من ضلعتو،
المهم خرجت منو، منين خرجت ما عندنا عرض.
توضرو فالدنيا.
أدم كان كيبحث على حوا في النهار وينعس بالليل.
حوا كتبحث بالليل والنهار ولما تلاقاو كالت ليه:
هذي هي بلاصتي ما تحركت ما تململت.
شفتو أول كذبة فالتاريخ.
اكتشفو العورة، عورها أو عوراتو، تعاورو مع بعضياتهم في الخلا ما كاين لا رقيب ولا حسيب ولا فاركونيت.
نتيجة هاذ التعاوير ولدو قابيل وهابيل وجوج بنات.
قابيل وهابيل ومن بعد ولى وائل، مارسيل، ميكائيل. عادل
المهم ما عندنا عرض.
أدم كان عاوحدو فالدنيا كيدردك، كلشي ديالو، الوطى والجبال، كيدردك كما بغى، أرض الله واسعة بر وبحر أوكان إلا احتاج لشي حاجة Urgente كيركب على موطور ويطير يجيبها ويجي مكان لا فوروج ولا زحام ولا والو، وحدو فوق الموطور منوض الغبارة عان عان عان عان...
كبر قابيل وهابيل، جا وقت التعاوير، هابيل بغى مرت قابيل تزايدو في الهضرة مني منك، مني منك، جبد هابيل الموس وغرسو فظهر خوه.
الموس منين جاه؟
الموس شراه من عند واحد ليهودي شارف كان قبل بونا أدم ساكن فواحد البريريكة.
جا الليل أوطاح الظلام والتخشخيش والبرد، بونا أدم خرج يفتش على اولادو هاز معاه بيل فيدو وكايفتش، مالقاش اولادو فالبلاصة، شير على طاكسي أومشى الكومسارية ديكلارا.
أتا أنا اسير نكول؟ كان شي طاكسي أولا كومسارية داك الوقت.
المهم ما عندنا عرض.
نبداو من الأول.
أدم كان وحدو Seul au monde بحال طوم هانكس، ديك الساعة طوم هانكس كان باقي صغير أولا باقي مادزادش. ماعرفت.
ما عندنا غرض.
أدم وحوا وحدهم في الدنيا، تعلمو يزرعو، يحرثو، يبنيو فين يسكنو. ما كاين لا طريطات ولا بيت الكرا ولا الحكم بالإفراغ ولا هم يحزنون والو عا الخلا والقفار، كانوا وحدهم مع الوحوش والطيور والهوا نقي والجبال. كان غير ليهودي الشويرف مونسهم بواحد الرويديو ديال الحجرة قديم خلاتو ليه عمتو شراتو من عند واحد الشينوي كان عا دايز.
المهم ما عندنا عرض.