صفحات من الزجل العتابي..(خليني أوكان)

صفحات من الزجل العتابي:.......( خليني أوكان)
لا تروح
وتخليني فلعداب
عفاك
نسيني محان وجروح
هنيني
يبرا لقلب لي طاب
"" """ """
يا صاحبي
خليني نهظر ونبوح
نديع بين الناس
نلبس قشاب،
خليني نبكي
حيث أنا مجروح
مصدوم تنعاني
والراس شاب،
خليني أوكان
الى كان مسموح
نبوس جبهتك
"يا أيت اعتاب"
خليني أوكان
نظهر ونبان
نتباها بنشوة الروح
نقرا
ونراجع لكتاب،،
خليني أوكان
نجمع خاطري لمليوح
ندون حروفي بيدي
وندير طليلة
علحباب،
خليني أوكان
خليني أوكان،
عطيني
من خيالك عنوان
نديرو فوق راسي
نتسارا بيه لوطان
نهزو بين كفوفي
فين ما مشيت
يكون لي همة وشان
""" """ """
خليني
نعرف طعم الحنان
نعيش
لحظة لهنا
نشرب
من كف الأمان،،
خليني
نعيش حياتي
نشري محبتي بالثمن
خليني ،
خليني نزيد
لا تربطني بالحرمان
خليني أنت
خليني أوكان،
ملي
تشوفني مدعوق
حدر وقول
الله يحسن لعوان،،
خليني
نفرح بلي كان،
لا نبقى محبوس
غارق
ف التيهان،
نسيت همومي
نسيت
وتفكرت
هموم الجيران،،
تفكرت الناس
لي ماتو
ماتو بالفقسة
وتنساو بين الحيطان،
مالقاو عوين
ديما يقديو
بلي كان
"" " """
تفكرت
شلا حوايج
تفكرت فلان
وفلان وفلان،
تفكرت الماضي
وحر الزمان،
المحنة
والهم
لي نخر لبدان،
خليني أوكان،
راني تفكرت
صراعات وحروب
تذكرت جميع الفتن،
تفكرت الثورة
ربيع لعرب
وتذكرت العنوان،
رماد الأسف
القنابل والنيران........
الزجال والمبدع العتابي: عبد الرحيم يونس
""( سنة سعيدة وكل عام وأنتم بخير ، جعلها الله عليكم وعلينا وعلى جميع الشعب المغربي وبالخصوص صاحب الجلالة الملك محمد السادس ، بموفور الصحة والعافية ،وأعادأمثال أمثالها على جلالته بالنصر والتمكين ، انه تعالى سميع مجيب ..