صفحات من الزجل العتابي: براكا

براكا. من شعيل النيران
براكا.من حفير الغيران
وريونا طريق
نمشيو فيها نيشان
عطيونا كود
نفتحو بيه, جميع البيبان
براكا
ما ترميو لينا لقشور
بغيتو تخليونا, اللور اللور
بغيتو تدفنونا, وسط الكركور
بين محان البطالة ,وحر الزمان
براكا من عداب التيهان
وسعو القاعة
وقبلو الطاعة
خليو الجْماعة تبان
لا ترسمو خيالنا
وتعدمو سلامنا
لا تشنقو كلامنا
وتحضرو سقامنا
تهديونا العنف ,وتهريس السنان
بغيتو تحطمونا بلي كان
مالكم يارهوط
درتو الزيادة ف المازوط
حتا ليصانص,ولا مشحوط
ما تسمع غير النقصان
المظاهرة والعصيان
وكلشي طلع ليه الخز
المواطن عايش بزز
ماتيعْجْن ماتيخْبزْ
يا لطيف شعلت فيه النيران
داتو لعجاجة
دارت بيه الدنيا فراجة
ما خلاتو يعيش
يتمتع بالامان..
قولو لينا, ياناس الايمان
واش طمعتو لينا,حتا ف الصيكان
او لا هاذي مهزلة
جات باش تكفس الحالة
وتلبسنا ذربالة
نبقاو ناعسين جنب الحيطان
مرة تلقانا مع الشمعة
ومرة نْتعبْرو ف الميزان
مرة نركبو كرْويلة
ومرة نتجارو مع الكيران
واش عرفتو المعنى د الكيران
او لا نزيدكم
الأسعار والزيادة ف الثمن
صورة فيها تكمشت لوصاف
وتهمشت صفة الانسان
تبدلت لوجوه
وصبح الما الصافي قطران
كلشي يبكي
كلشي يشكي
كلشي يحكي قصتو مع لحزان
ها المحير بغدايدو
ها لمشير بوسايدو
ها لغادي هاز رحيلو هربان
شكون يقابل لبلاصة
وشكون يعمر لمكان
كلشي بغا يوصل ,كلشي زربان
حتا من الشاف, طالع لو الدم غضبان
هز شكارتو
بردع حمارتو
زاد ونعل الشيطان
ماقال, نشوف اشنو وقع
ماقال, نسد الباب لمترع
ماقال,نشوف واش كاين, مانرقع
غادي وحال فمو جيعان
يا خوتي
جانا بوتفتاف
جانا وْزيْرْنا بزاف
هز علينا الثقل
طيح لينا لكثاف
دارنا عبيد
ما عرف كاع, قيمة الانسان
ضاع الامل
وتهدم السور ,قدام الشبان
لا قراية ,لا خدمة ,ولا طمئنان
لا دنيا
لا بيع وشرا, على قد الحال
لا فرحة تنور القلب
لا محبة ولا حنان
مالك, واش كبر ليك الشان
اولا درتي زريبة
ورجعت فعالك غريبة
حتا وقع ,لي ماكان, ف الحسبان
ملي الكرامة
تتمرمد ف التراب تتهان
ملي الراس يتْنْحر
ملي يتفلق يافلان
لا باقي تسول
راه بان البرهان
هاذي زريبة
عامرة بلكفان
مطمورة فيها كنايز
كلشي ميت ,وتفنات لوطان
الغادي مجلي
والواقف, هلكو الصهد عركان
شعرو مدلي
ماهو مرا ,ماهو دري
دخل للرحبة ,ودارها تيران
شد بلاصتو وتكمش
ما تيحشم ما تيرمش
فعلو غريب محنش
كل مرة ينيش ,حاكر عل الصبيان
دار زريبتو
وتجوج نسيبتو
تعوجْت صيفتو
او ولدت ليه النقصان
شدت ليه ديب
تزين بوصاف الشيب
ولا يقْطعْ الطرْقان....
"الزجال :عبد الرحيم يونس..
ايت اعتاب .اقليم ازيلال.
0672513154
akraoun@hotmail.fr