راه تسيب غير مسبوق ف"دوزيم". بعد فضيحة عصابة استراليا ادارة القناة رسلات كوتش للكوت ديفوار وعيطات لسفارتنا باش ترسل ليها طونوبيلة

علمت "كود" من مصدر من سفارة المغرب فابيدجان بالكوت ديفوار انو بتزامن مع زيارة رئيس الحكومة عزيز اخنوش لهاد البلد قبل اسابيع٬ توصلات السفارة باتصال باش يتلقاو لشخصية مهمة راسلاها ادارة القناة الثانية "دوزيم". مصدر "كود" قال انو بعد وصول الطونوبيلة وخروج هاد الشخصية٬ اكتاشفو انها غير كوتش من هاد الكوتشات التافهين اللي كثر من المؤثرين وانها مفروضة على شي برنامج كتقدمو شي وحدة اسمها عزيزة.
واكد مصدر "كود" ان لا السفارة المغربية فهمات هاد التصرف ولا حتى الناس اللي كانو فهاد الزيارة. هاد الكوتش يضيف مصدر "كود"٬ جات على شي غرض اخر ولقات راسها كتعامل شخصية مهمة بزاف واخا ما عندها حتى اهمية.
دابا واش سفارة المغرب فابيدجان متسيبة حتى لهاد الدرجة باش تتلقى اتصال من ادارة دوزيم وتنفذ الطلب؟ ثم شكون هادا اللي فالادارة العامة اللي اتصل؟ واش المدير العام ولا هاديك المديرة المالية اللي نهار على نهار كيتزاد نفوذها وبسالتها
كاين مشكل كبير فهاد القناة. كاين تسيب. الدولة كلها كتدعم هاد التسيب. ساكتة وما دارت حتى شي تغيير لا فهاد القناة ولا فالشركة الوطنية للاذاعة والتلفزيون