شكون "قتل" الغماري؟ وها علاش خاص فتح تحقيق. "دوزيم" مسؤولة على "قتلو" والدولة حتى هي. 120 يوم خدمة ما حكش فيها راسو وتزاد عليه ضغط "صوتكم" وفوق هاد الشي كلشي مسدود

برنامج دارتو "ارتي" ف"گزينوس" على "الضغط فالخدمة" كيبين بتجارب علمية كيفاش يكون الشخص فالضغط فالعمل. كيعطي صورة صغيرة على احتمالات وفاة الصحافي ف"دوزيم" صلاح الدين الغماري. مات بسكتة قلبية البارح فالمحمدية. الصحافي خدم بزاف بزاف من نهار بدات الجايحة. كان عليه ضغط كبير. ضغط باش ينجح باش كل حلقة تكون مزيانة. بعدها ما حكش راسو داز مباشرة لبرنامج "صوتكم" اللي دار فالبرمجة الجديدة وكان غادي يبدا الاثنين اللي جاي.
وفق مصادر من "دوزيم" ل"كود" فالصحافي دوز 120 يوم الضريب والخدمة بلا توقف. زاد بقى فنفس النيفو مع الشبكة الجديدة اللي غادي يقدم فيها برنامج "صوتكم". فهاداك البرنامج اللي قدماتو القناة الالمانية الفرنسية بينو ان اللي كيخدم ما بين 70 و80 ساعة فالسيمانا وما كياخدش عطلة كياثر هاد الشي على القلب بزاف. كيفاش؟ طبيا ان حالة الضغط كتخلي القلب نشيط وهاد النجاح كيخليه محتاج بزاف للطاقة. فهاد اللحظة كينتج الباكرياس لانسولين بزاف ولگليكوز كيبدا يتحرك فخلايانا. هاد الشي كيخلي الضغط الدموي ودقات القلب تطلع باش يقدر الاوكسجين يوصل للدماغ وعليه تتحرر الطاقة.
طبعا ماشي كاع الاجساد تقدر تتفاعل مع هاد الشي بنفس الطريقة. اللي وقع فحالات الغماري ان الانشطة اللي يقدر بنادم يديكوبريسي هاد الضغط كلها واقفة مع كورونا. ايلى عندو مع الرياضة راه القاعات الرياضية مسدودة ولا عزيز عليه النشاط راه كلشي مسدود لا مطاعم لا اماكن الليل مفتوحة…. يعني الضغط كيولي مضاعف
"دوزيم" عندها مسؤولية فهاد الوفاة. "دوزيم" كطريقة الاشتغال ديالها كتخلي الضغط يكون كبير بزاف على الصحافيين. راه ماشي صحافي كيقدم يعني عندو فرقة كبيرة خدامة معاه بحال ديال تلفزيونات الدول المتقدمة. اللا. راه باش تقدم خاصك توجد تقريبا بوجدك وتتصل وتفكر فالمضمون وفالشكل وحتى حوايجك انت اللي تختارهم. ضغط كبير بزاف بزاف. وفوق هاد الشي كولو خاص برنامجك يكون ناجح.
دوزيم كتعيش ازمة مالية. هاد الشي خلى طريقة اشتغالها تزاد تكرفص. الضغط على الصحافيين وكاع اللي خدامين فيها كيتزاد. راه حتى المدير العام سليم الشيخ كيعيش نفس الضغط. يعني انو ضحية "قناة". يعني حادثة السكتة القلبية اللي وقعات للغماري البارح تقدر تتكرر فهاد القناة.
الدولة كذلك عندها مسؤولية فوفاة الغماري. بقات كتفرج. فشلات تقدم البدائل. نور الدين الصايل المدير السابق للقناة هادي سنوات عطاهم الحل: فتح القناة للرأسمال الاجنبي. ديك الساعة ديونها قليلة وكانت امكانية بيعها متاحة. اليوم خسائرها كثيرة والدولة ما كتقدمش ليها دعم كبير.
خاص فتح تحقيق نزيه فوفاة الغماري. هاديك اجلو وصل راها كتسلك بزافت المسؤولين. خاصنا نعرفو. طبيب القناة ممكن يقول لينا بزاف. الحالة الصحية ديال الصحافيين. قلوبهم كيف دايرة. راه الضغط عندو تأثير على امور كثيرة منها ارتفاع الضغط الدموي او الاصابة بالسكري. دابا الكورة فيد الدولة فيد القناة فيد صحافيي القناة
رابط حلقة "ارتي" على ضغط العمل