ولد لملايري رشيد هيلا الحلقة الغامضة والمتهم المظلوم فقضية "لومبورگيني". ما عندها معنى استمرار اعتقالو فكسيدة ما عندو فيها يد واستهدافو كيخلع

حصلت "كود" على معطيات كثيرة فقضية كسيدة المضيق اللي وقعات بين "لومبورگيني" وطاكسي هادي 10 ايام. القضية بدات بكسيدة وبمتهم هربان مع مراتو الفرنسية وبطبيب عطا شهادة طبية. كلشي الى لهنا كلشي مقبول ومعقول. خاصة ان للي كان فالطونوبيلة هرب وجابو شيفور باش يتحمل القضية وهاد الشيفور حصل.
باش تفهمو كثر هاد القضية ديال لومبورگيني اجيو نبداو من اللول. حدا البنك الشعبي بشارع لالة نزهة بالمضيق ليلة 14 غشت 2022 وقعات كسيدة. طونوبيلة "لومبورگيني" دخلات فطاكسي "داسيا" كان مركب جوج كليان. كلشي تخلع. الطونوبيلة الغالية دگدگات والطاكسي كلى لعصا بزاف. وقفات طونوبيلة لحد الان ما معروفش مولاها وهز او هرب اللي كان سايگ لومبورگيني والفرنسية اللي معاه اللي غاديين نعرفو انها مراتو.
الشيفور واللي معاه تكتب ليهم عمر جديد. تزگلو. مشاو للصبيطار. طبعا جا البوليس ما لقاوش مول الطونوبيلة. فالصباح جا للكوميسارية شخص قدم راسو باللي هو الشيفور ديال هاديك "لومبورگيني". البوليسي بخبرتو طيرو من اللول باللي ماشي هو الشيفور. غادي يخوي ليهم لمزيودة.
واحد الشخص اسمو عثمان هو اللي عطا الطونوبيلة لانس اللي كان فالطونوبيلة ومراتو٬ هو اللي رسل شيفورو باش يكذب ويضلل العدالة ويقول باللي هو اللي كان سايگ.
البوليس كمل تحقيقو باشراف النيابة العامة. كلشي كان مزيان وبزاف.
الطونوبيلة غادي يبان باللي فالاصل كانت ديال ولد لملايري رشيد هيلا ولكن كاينة وثيقة كيخلي فيها مسؤوليتو باش عطاها لهاد عثمان.
دابا من هاد الفيلم بدا كيبان باللي المتهم الرئيسي فهاد الفيلم ماشي اللي هرب من الطونوبيلة ولكن هاد ولد لملايري. كتحس باللي كاين استهداف غريب. شدوه فميناء طنجة الميناء باش كان غادي طالع لاسبانيا. سولوه اسئلة غريبة حسب احد محاميه ل"كود". مشاو معاه بزاف بعيد. واخا داك الشي قانوني ولكن ماشي على موضوع بحال هادا.
هاد ولد لملايري المبلي بالطونوبيلات الغاليين حقاش عندو الامكانيات لهاد الشي٬ ما عندو علاقة بتاريخ هاد الطونوبيلة. ما عندو علاقة واش دازت على جميع الادارات المغربية باش دونات ولا اللا. هو شراها ببلايك مغربية. فحالة ايلى كانت شي حاجة خاصهم يشوفو مع اللي باعها ليه وعندو گاراج فالرباط ومعروف.
استمرار اعتقالو كيخلع. على كلشي اللي تقال وحسب ما نقلو احد محاميه ل"كود" وحسب ما علمته "كود" من مصادر مقربة منو٬ راه ما دار والو لحد الان مخالف للقانون.
وحتى ايلى كشف البحث شي حاجة راه استمرار اعتقالو ما مفهومش.
واش اعتقالو درس لاولاد لملايرية؟ ما كنظنش بلادنا غبية باش طيح فهاد الشي. اولاد لملايرية اللي خالف القانون راه يخلص بحالو بحال غيرو. واش عندو علاقة بقضية "الجنس الجماعي" اللي كان متابع فيها رشيد هيلا ووقعات قبل اسابيع فكازا وخرج منها؟ ممكن غير ماشي منطقي. هاديك قضية وهادي قضية. ما يمكنش تصلح قضية باخرى. ما كايناش شي حاجة فالقانون كتخلص على زبلة سابقة.
فبلادنا كاينين حكماء عقلاء فالقضاء. لان هاد الشي عندو علاقة بالقضاء. فقط القضاء. حتى شي جهاز اخر ما عندو شي دخل بقضية ولد هيلا. لحسن الحظ ان اللي شادين شؤون القضاء الفوق ناس بعقلهم. اولاد القانون. ما يمكنش يقبلو التجاوزات. هاد الشي خاصو يتصلح اليوم قبل غدا. راه الظلم عيب