رئيس اتحاد طنجة استاقل من الصبيلون. كيفاش شي حد كيهدر على الصدق والتفاني وراسل استقالة من الكوسطا ديل صول

قرر محمد الشرقاوي رئيس اتحاد طنجة يمشي بحالو على الفريق، ويخلي منصب الرئاسة بشكل مفاجئ بعد أشهر فقط تقلد فيها الإشراف على النادي.
حسب مصدر ل"كود" فرئيس مقاطعة طنجة المدينة الاستقالة دارها وهو كيدوز عطلتو فكوسطا ديل صول جنوب اسبانيا.
وأعلن محمد الشرقاوي، ليلة الأحد- الاثنين، عن الاستقالة من رئاسة اتحاد طنجة، من خلال تدوينة بفيسبوك قال فيها: "بصفتي رئيس نادي إتحاد طنجة لكرة القدم، أعلن استقالتي من جميع المسؤليات التي تحملتها بشرف و صدق وتفاني، ودائما كان لي الشرف في خدمت مدينتي الغالية أو فريقي الغالي، وبهاذا و بعد تفكير عميق قررت أن أستقيل من جميع مهامي، و شكرا".
السيد اللي كيهدر على الشرف والصدق والتفاني ومقدم استقالتو من خارج المغرب. الصدق والتفاني كتقتضي حتى تدخل وحط استقالتك
وكيجي إعلان محمد الشرقاوي على الاستقالة من اتحاد طنجة بعد أشهر فقط على انتخابو رئيس للنادي، ومساهمتو فإنقاذ الفريق الموسم الماضي من النزول إلى القسم الثاني بعدما شد عروسة الشمال هي فالمركز الأخير وصوفاها بخدمة المدرب واللاعبين اللي جاب، ولكن كيجي باش يوضع هاد إعلان الاستقالة ديالو أيضا مجموعة من الأسئلة كتعلق على شنو الأسباب وراه رحيل الرئيس الشرقاوي، واش عندها علاقة بالمديونية والأزمة المالية الخانقة اللي فيها النادي، بسبب النزاعات اللي خالقة له عجز فالميزانية ومانعاه من تسجيل اللاعبين الجداد.
هاد الشرقاوي كان غير رويضة سوكور جابها يوسف بنجلون لملايري مول الحوت والطاشرون اللي غادي ويكبر. هاد الشخص اللي كان نكرة سياسية هادي سنين فالمدينة ولى الامر الناهي فكلشي. كان جابو بعد فشل المفاوضات مع الرئيس الاسبق ابرشان.
https://www.facebook.com/permalink.php?story_fbid=pfbid02mzzTRL3DkAYAPbUqEdf4Vd8apEqdxpvZk3o856qw42Lt5i84PYMDaDJ7SNusA5v2l&id=100010786056587